SHILLONG: Assam aro Meghalaya a·dokni gisepo meligrikna man·jaenggipa sima jolrango, Assam sorkari aro Assam a·doko songdongenggipa manderangni jakchi dokkol ka·ako man·e Meghalaya a·dok ning·o donggipa manderang neng·nikanirangko chagrongna nangtokengani gimin ia meligrikna man·jaenggipa biaprangko a·dok damgnini gisepo songgigrika matchotkujaskal, a·dokni manderangna chel·chakaniko on·china gita dingtang dingtang MLA-rang, a·dok sorkariko didiangaha.
Iani bidingo, Mawhati constituency-ni Congress MLA Charles Marngar, Assembly-ni Budget Session-o chanchirimaniko dakdilangengon, Meghalaya a·dokni sima jolrango songdongenggipa manderangko Assam police-rang dokkol ka·enga aro Meghalaya a·doko smu game cha·enggipa manderangoniko Karbi Anglong Autonomous Council, kajinarangko bang·bate gilenga ine matnangataha.
Marngar-ni aganani gitade, Meghalaya a·dokni sima jolrango ka·enggipa kamrangko Assam sorkari champengrongna jotton ka·enga indiba sima jolrango Assam a·dokni ka·enggipa kamrangkode Meghalaya a·dokni gita maming champenganirang dongjaengachim.
Assam a·dokni official-rang, Meghalaya Police baksa baditaba chang tom·e agangrikani ja·manoba Assam police-rang, Meghalaya a·dokni songrangona re·bae dokkol ka·engani a·sel ia jolrango songdongenggipa manderang kenchipchipe janggi tangna nangtokenga ineba ua aganaha.
Iani bidingo ua gnigipa changna Assembly-o u·iatenga ine janapatengon, ia jolrango ong·enggipa obostarangko nirokatchina aro Meghalaya a·doko smu game cha·enggipa manderangoniko KAAC-ni kajina gile ra·aniko dontongatchina Congress MLA, a·dokni Chief Minister-ko mol·molataha.
Ia chanchirimanio, VPP-ni MLA Ardent Miller Basaiawmoit-ba bak ra·angpaengon, sima jolrango songdongenggipa neng·nikanirangara chengonin ong·a aro dolgni songgigrikanichisa iako namatna man·gen ine parakataha.
Meghalaya a·doko smu game cha·giparangoniko KAAC, kajina gile ra·enga ine matnanganina suk ong·gijaniko parakatengon, ian saljrakjrako ra·seke ra·amingsa apsan ong·enga aro iandake niam gri dakaniko dontongna nangchongmota ine UDP-ni MLA Renikton Tongkhar parakatskaaha.