SHILLONG: Batanggimin bilsirango gita a·doko songdongenggipa manderang neng·nikanirangko man·jana gita ia bilside load shedding ba bijoli kimitani somoiko sorkari komiatna jotton ka·gen ine a·dokni Chief Minister Conrad K Sangma ku·rachakaniko on·angaha.
“Re·anggipa bilsio gita ia bilsiode apsan dakgipa neng·nikanirangko chagrongna nangjawa ine chinga ka·dongsoenga. Load shedding dongjawa inede anga ku·rachakaniko on·jaenga indiba load shedding-ni somoiko chinga komiatna jotton ka·gen,” ine Sangma, Assembly-ni budget session-o aganaha.
Chief Minister-ni talatani gitade, gipinrangoniko ra·gipa bijolirangko on·pilskana man·na gitasa sorkari batanggimin somoirango bijolirangko chimongrikahachim.
“Re·anggipa bilsio namen neng·nikanirangko chagrongna nangaha. Bijoliko baditaba unit-rangni gita chinga chimongrikahani gimin da·o baditaba unit-ni bijolirangko chinga ra·na nanggenchimoba ja·mano chinga uarangko on·pilgen,” ine Sangma aganaha.
Bijoliko chimongrikahani a·selsa re·anggipa bilsio, May, June, July aro August jarang baksana mikkarang waani ja·manba bijoliko kimitna gita nangkuaha ineba ua aganaha.
“January, February aro March jarango chingna bijoliko on·gipa agency-rangna bijoliko bikote on·pilskaahani giminsa wachini somoirangona kingkingan load shedding-ko ka·na nangaha indiba iako dakanichi chinga chingna bijoliko on·gipa company-rangna salantian million 2 unit-mangni gita bijolirangko on·pilskana man·aha,” ine Chief Minister parakataha.
Dam komiting somoirango bijoliko bree, dam rakmiting somoirango bijoliko palskana gitaba sorkari ja·kuko de·aha ineba ua aganaha.