SHILLONG: Eklavya Model Residential School (EMRS)-rangoba a·dokni reservation policy-ko ja·rikna gita a·dok sorkari, ma·mong sorkarina sedoataha ine Sukrobar salo, Meghalaya a·dokni Chief Minister Conrad K Sangma parakataha.
Assembly-ni budget session-o Nongkrem-ni VPP MLA Ardent Miller Basaiawmoit-ni sing·anirangna aganchakaniko on·angengon, Union Tribal Affairs Minister baksa tom·e agangrikani somoion EMRS-rangoba reservation policy-ko ja·rikna on·na gita aganmanaha ine a·dokni Chief Minister Conrad Sangma parakataha.
“Beben chinga seachi ku·rachakaniko man·kuja indiba iani bidingo chinga ma·mong sorkari baksa agangrikengkua. EMRS-rangko kulianichi hajalni hajal kamrangko ong·katatna dakchakgen,” ine ua aganaha.
Iana skang, a·dokni Education Minister Rakkam A Sangma-ba iani bidingo aganchakaniko on·angengon, EMRS-o state reservation policy-de nangchakeani dongjawa indiba EMRS-o reservation policy-ko ja·rikna gita ma·mong sorkarina seataha ine parakataha.
“EMRS-rango a·dokni reservation policy-ko ja·rikna gita chinga ma·mong sorkarina sedoataha indiba da·o dipet iani bidingo India sorkarini aganchakaniko man·sokujaenga,” ine Sangma aganaha.
Minggipin aganchakaniko on·angskaengon, a·doko EMRS-ni nokrangko rikanio kamrang ka·sinengani gimin ua Union Tribal Affairs Minister baksa agangrikataha ine Chief Minister parakataha.
“Uni gimin chinga ma·mong sorkari baksa agangrikangkugen aro chinga namgipa aganchakaniko man·na ka·dongenga,” ine CM aganaha.
Indake ong·engon, ma·mong sorkarini dongimin niamrango pangchake, EMRS skulrangna a·arangko indin on·gilgipasa ong·na nangani gimin a·arangko ra·anio neng·nikanirangko man·na nangengani a·sel bang·bata block-rangon kamrang ja·manchakatako man·enga ine Education Minister parakatskaaha.
“Bang·bata block-rangon a·arangko ra·anio neng·nikanirangko man·na nangenga. Tom·e chanchirimani ja·man mitam skulrangkode matchotengaha ine chinga nikna man·aha aro kamrangko ta·raken matchotna ka·dongenga,” ine Sangma aganaha.
Mawlai, Sohiong aro Mawpat block-rangode EMRS-rangko on·jaenga ine Mawlai-ni MLA Brightstarwell Marbaniang-ni sing·anina aganchakaniko on·angskaengon, a·dokni pilak block-rangon EMRS-ko kulina gita bakan a·dok sorkari, ma·mong sorkarina seatgen ine Education Minister ku·rachakaniko on·angaha.
Pahamsyiem aro Samanda block-rangode EMRS nokrangko rika matchotahani gimin ia 2024 bilsini April 1 tarikonide class-rangko a·bachengatna sorkari miksongenga ineba Education Minister parakataha.