WILLIAMNAGAR: Garo Hills Autonomous District Council (GHADC)-o kam ka·enggipa manderang, an·tangtangni man·na nangkuenggipa ja 32-ni dormaharangko man·kujaengani a·sel neng·nikanirangko chagrongna nangtokengani gimin GHADC-o kam ka·enggiparangna ta·raken dormaharangko on·china A·chik Progressive Approach (APA) dolba GHADC-ni Executive Committee-ko didiataha.
“GHADC-o kam ka·enggiparang, bilsi gittammang ong·pile dormaharangko man·tokkujaengani a·sel uamangni nokdangrang neng·nikanirangko chagrongna nangtokengani gimin chingaba uamangna suk ong·chakja. Indita jarangni dormaharangko man·kujaengani a·sel uamang cha·ani ringani gri ong·na nangpilenga aro bi·sarangba poraianirangko dontongna nangpilenga ine knasona namen ka·a be·ani ong·a,” ine APA-ni dilgiparang parakataha.
GHADC-o kam ka·enggiparangna dormaharangko on·china Non Gazetted Employees Association (NGEA)-ni dabianio chakpaaniko parakatengon, “Mande salsa migri chigri ong·on ba dedrang skul ba college-rangchi re·na man·jaon badita neng·nikanirangko chagrongna nanga iako Executive Committee-ni membor-rang ma·sichakna nanga. GHADC-o kam ka·giparang an·tangtangni dormaharangko dabina gita bilrang donga aro uamangni man·gni dormaharangko DC ta·raken on·na nanga,” ine APA parakataha.
GHADC-o kam ka·enggiparangna dormaharangko on·janiara India a·songni niam bidiko dongimin niamrangko pe·ani gita ong·enga ineba APA parakataha.
GHADC-o kam ka·giparangko, High Powered Committee-ni chairman Rakesh Newar Sangma, CEM-ni office ning·o kragija kattarangchi saiaha ine matnangatengon, GHADC-o kam ka·giparangna dormaharangko ta·rake on·jagenchimode mikkangchi NGEA-ni jingjengatanirango uamangba bak ra·anggen ine APA parakataha.
