TURA: Garo National Liberation Army (GNLA) bobil dolko bikottaiaha ine social media-rango jangbingbangenggipani bidingo police-rang am·sandina a·bachengataha.
An·tangko GNLA bobil dolni chairman ine soi ka·enba saksa Goera Pantora Sangma minggipa mandeni bimingo, batanggimin salrangonin social media-rango GNLA bobil dolko bikottaiaha ine watpriprana a·bachengatahachim ine nikna man·a.
Indake ong·engon, da·o dipet iani bidingo name aganna gita man·kujaenga indiba police-rang, kakketko am·sandina a·bachengataha ine West Garo Hills a·jani Superintendent of Police (SP) Dawa Aswaghosh parakataha.
“Iani bidingo aganna gita agre seng·gnangdugakuenga indiba chingni department, iani bidingo am·sandienga. Adita salrangni gisepon chinga iani bidingo talbate u·iatna man·gen,” ine SP aganaha.
GNLA bobil dolko bikottaianiara namen aiao inmanani ong·a ineba department-ni mitam official-rang aganaha.
Re·anggipa bilsiosan, GNLA bobil dolo sak 500 manderangko rimnaptaiaha aro Meghalaya a·dokni South Garo Hills aro West Khasi Hills a·jarango uamangna training-rangko on·enga ine an·tangtangni photo-rangko aro video-rangko social media-o watatani ja·man police-rang, mande sakgniko rim·ahachim.
Ia mande sakgni, tangka paisarangko dabie ra·na gitasa an·tangtangko GNLA bobil dolni gital dilgiparang ine a·kangtokahachim ine ja·mano police-rang ma·sina man·aha.
Indake ong·engon, GNLA bobil dolko bikottaia ine jangbingbanganiko GNLA bobil dolni gitcham membor saksa raken jegalatskaaha aro ian uamangni janggi tanganiko neng·nikatna jotton ka·anisan ong·enga ine parakataha.
“Ia sal somoirango police network namen bilakani gimin GNLA bobil dolko bikottaiaha ine a·kanganikode bebera·na man·ja. Chingni chanchiani gitade, badiaba manderangsa tangka paisarangko dabie ra·na iako dakengakon. Ia manderang, iandake tangka paisarangko dabie ra·na dakenga ong·ode chinga da·o tom·tome dongpaenggiparangkosa maming a·sel gri okamatenba sing·sandie roskagnok,” ine an·tangko bame on·gimin GNLA bobil dolni gitcham membor saksa aganaha.
