SHILLONG: Ma·mong sorkarini dingtang dingtang office aro institute-rango kamrangko on·anio jolni chadamberangko nichengna gita ma·mong sorkari baksa agangrikchina Sukrobar salo, dingtang dingtang MLA-rang, a·dok sorkariko didiangtokaha.
Assembly-ni budget session-ko ong·atanio, Nongkrem-ni VPP MLA Ardent Miller Basaiawmoit, central institute-rango Tribal manderangni bilrangko chel·chakna gita man·jaenga ine sorkariko matnangatengenba, Meghalaya a·doko NEIGRIHMS, NEHU, Central Excise, CBI, CPWD, NEEPCO, Powergrid, BSNL, NEPA, ICAR, Airport Authority of India (AAI) aro uandakgipa dingtang dingtang ma·mong sorkarini office aro institute-rang dam 46-na baten donga indiba iandakgipa ma·mong sorkarini office-rango, joltangni Tribal-rangkode nichanggalenga ine parakataha.
India a·songo civil post aro civil service-rangni kamrango Schedule Caste-na 15 percent, Scheduled Tribe-na 7.5 percent aro gipin class-rangna 27 percent reservation donga ine janapatengon, Group C aro Group D-ode joltangni candidate-rangna dingtangmancha reservation aro direct recruitment dongachim ine VPP MLA parakataha.
“Ia niamo u·iatani gitade, Group C aro D-ni ning·o Meghalaya a·dokni chadamberang 45 percent-kon direct recruitment-o man·ani ong·achim aro iachi a·dokni chadamberang bang·en namgnirangko man·genchim,” ine Basaiawmoit aganaha.
NEHU-ni bidingo toe janapatengon, salgro salaramni pilak a·dokrangon an·tangtangni central university-rang dongachim indiba NEHU-o gipin a·dokrangni Tribal-rangba 7.5 percent biaprangkode man·engkua ine Basaiawmoit aganaha.
Ia sal somoirango kamrangko ong·katate on·na sorkarina altua kam ong·ja ine janapatengon, ia cholrangko ra·e a·doko donggipa ma·mong sorkarini office-rango a·doktangni Tribal chadamberangna cholrangko on·chengna gita ma·mong sorkari baksa agangrikchina VPP MLA, a·dok sorkariko didiangaha.
Ia chanchirimanio, Amlarem-ni UDP MLA Lahkmen Rymbui-ba bak ra·angpaengon, Meghalaya a·doko dam 38 Eklavya Model Residential School (EMRS)-rang dongani gimin ia skul damprakon ge 52 kamrangkode man·gen ine parakataha.
