SHILLONG: Meghalaya-ni Chief Minister Conrad Sangma, Shillong-o donggipa manderangko ja·achi re·ani bewalko nambatatako nangnike Shillong-ni bang·a biaprangon ja·achi re·na manderangna rama naman dongja aro bang·a somaion manderang sorokko re·draana nangaia ine suk ong·gija aganaha.
Saoba mande Civil Hospital-oni Keating Road-ko ja·achi re·na sikenchimoba garirangni aro scooter-rangni gisepko re·na nangaia maina ia sikket-changket dakgipa a·jolrango ja·achi re·na raman dongja.
IGP, Raj Bhawan, Police Bazar ba unagreba gipin gipin biaprang gita mitam biaprango ja·achi re·giparangna namgipa ramarang dongengon songjinmao bang·a biaprangon ramarang be·arang aro re·na man·gijanirang donga.
Bang·a ramarangon mande saksa sakgipinko watgrikna ramaan dongja. Minggipin mitam ja·achi re·na tarigipa ramarang jedake Civil Hospital mikkango dilsa donggipa ramakoba palgipa-simgiparangan dokkol ka·aha aro manderang ua ja·achi re·na tarigipa ramako re·na man·jae sorokko re·na nangaiaha.
Smart City project-ni ning·o, sorkari adita ja·achi re·ani ramarangko tarina nangnikenga indiba basako aro bano ong·gen uko ma·sija.
Aroba Police Bazar-o bakroen ja·achi re·na manderangko didina ru·uta somairangna skangon tile-rangko anaha indiba rama sambao palgipa-simgiparangni a·sel sikket-changket dakkuaienga aroba unbaksana ua ramakon garirangba re·kuenga.
U·IATIMGIPAONI
SHILLONG: Meghalaya State House-ko rikna Meghalaya Sorkari, Banglore Urban District (Karnataka)-o a·ako brena skani (expression of interest) EOI-ko on·aha.
Meghalaya State House-ko a·bachengatna Meghalaya Sorkarini General Department, Karnataka, Bangalore Urban District-o 5000-8000 sq a·ako brena sikenga.
Ia miksonganio Meghalaya sorkarini General Administration Department ia EOI lekkarango nangako janapani gita kragipa a·ako on·china a·a nokgiparangna u·iatanirangko on·aha.
Lekkao janapani gita nangnikenggipa a·a Kempegowda International Airport-ona sepangkalgipa biap ong·na nanggen. Meghalaya House-ko rikna de·e ra·baengon airport-oni aro Bangalore songjinmaoni bang·e chel·na nangjawa ine u·iatanio janapaha.
