TURA: Tura jillani sambao donggipa adita a·kingrangko Tura Municipality-ni ning·o napatna u·iataniko on·ahani gimin Tura-ni MDC aro BJP Meghalaya-ni state vice president Bernard N Marak, a·dok sorkariko jegalataha.
Marak-ni parakatani gitade, Tura jillani sambao donggipa Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingni Nokmarang aro GHADC baksa agangrikchenggija, ia a·kingrangko Tura Municipality-ni ning·o napatna u·iatmanahachim.
A·king Nokmarang aro GHADC baksa maming agangrikchenggija ia a·kingrangko Tura Municipality-ni ning·o napatna sorkari miksongenga ine matnangatengon, ian Indian Constitution-ni Article 243ZC-ni ning·o dongimin niamrangko pe·ani gita ong·enga ine Marak parakataha.
“Danakgre, Doldigre, Alotgre, Darechikgre, Duragre, Chasingre, Ballonggre aro Rongkhongre a·kingrangko Tura Municipality-ni ning·o napatna proposal-ko ra·bana skang a·dok sorkari, a·king nokmarang aro GHADC baksa agangrikchengna nanga maina Scheduled Area-rangode sorkari bil dongja indiba Nokmarang aro autonomous district council (ADC)-rangsa bil man·a. Uni gimin GHADC-ni Tura MDC constituency-ni ning·o donggipa songrangko Municipality-ni ning·o ong·atna sorkari jotton ka·na nangja,” ine Tura MDC parakataha.
Constutition-o Sixth Schedule-ko a·dokni a·brirango songdongenggipa Tribal-rangnasa on·aha ine talataniko on·angengon, a·dok sorkarini Sixth Scheduled a·jarangona napdrana jotton ka·aniko BJP sorkari nie dongjawa ine Marak parakataha.
“2014 bilsion municipality-rangko bon·atna gita Delhi-o songgigrike soi ka·grikmanahachim indiba Garo Hills-o Nokmarang aro GHADC-ni permission gri da·omangba municipality board aro gipin municipality-rangko chalaikuenga. Municipality-rang, Tribal-rangonikon kajinarangko gile ra·engani gimin iako a·dok sorkari dontongna nangchongmota,” ine Tura MDC parakataha.