SHILLONG: ‘Viksit Bharat Modi ki Guarantee’-ni bak gita ia bilsini Lok Sabha election-na manifesto-ko tarianio manderangni nangnikani aro ku·pattianirangko ra·na gita Budbar salo, Bharatiya Janata Party (BJP)-ni state president Rikman G Momin, dingtangmancha campaign-ko a·bachengataha.
Ia campaign-ko ong·atani bidingo talataniko on·atengon, mikkangchi a·songna aro a·songo songdongenggipa manderangna nambate kamrangko dangdike on·na man·na gita manderangni nangnikanirangko BJP-ni election manifesto-o ra·na ia campaign-ko ong·atenga ine Budbar salo, BJP Meghalaya Pradesh-ni media coordinator parakataha.
India a·songara manderangchi, manderangna aro manderangonin sorkariko chalaigipa a·song ong·ani gimin sorkarini kamrangko ka·anio manderangni nangnikani gita ong·atna ia ja·kuko de·aha ineba BJP Meghalaya-ni media coordinator parakataha.
“Ia campaign-ni ning·o mandal ge·antini BJP office-rangon, dingtangmancha suggestion box-ranbgko dongen, jeon manderang, an·tangtangni nangnikanirangko seachi pu·one u·iatna man·gen. Meghalaya a·dokni ning·o donggipa pilak NGO-rang, self help group-rang, dingtang dingtang dolrang aro a·doko songdongenggipa manderang pilakkon an·tangtangni nangnikanirangko aro ku·pattianirangko ia suggestion box-o seachi u·iatchina chinga didiatenga. Je manderangan, BJP office-rangna re·angna man·jachim, NaMo app-o internet gita ba 9090902024 nombor-ona miss call on·e an·tangtangni nangnikani aro ku·pattianirangko on·atskana man·gen,” ine BJP Meghalaya-ni media coordinator parakataha.
Ia campaign-ko a·bachengatanio, BJP Meghalaya Pradesh-ni state president Rikman G Momin aganprakangengon, a·songko chalaianide a·songo songdongenggipa manderangni jakon ong·a ine BJP bebera·ani gimin ia campaign-ko a·bachengatanichi, manderangni nangnikani gita sorkariko chalaina man·gen ine parakataha.