SHILLONG: National People’s Party (NPP)-chi dilenggipa Meghalaya Democratic Alliance (MDA)-o bak ong·enggipa sak 188 politician-rangko sorkarini dingtang dingtang kamrango rakkianio ‘maming ong·gijani dongja’ ine a·dokni Chief Minister Conrad K Sangma a·kangengoba, ia dilgiparangko sorkarini dingtang dingtang kamrango rakkianichi a·dokni tangka paisarang indin bon·angenga ine Opposition Congress dolni MLA Saleng A Sangma parakatskaaha.
Ia politician-rangko sorkarini dingtang dingtang kamrango rakkianichi uamang a·dokna baditako on·pilskaenga ine sing·doatengon, ia politician-rangko sorkarini dingtang dingtang kamrango rakkianichi gong lak 12-kosan sorkari koros ka·na nangenga ine Chief Minister-ni a·kanganikoba Sangma jegalataha aro iandakgipa dilgiparangna sorkarini on·enggipa nok para, POL, TA/DA aro uandakgipa man·gnirangkode Chief Minister parakjahakon ine Saleng matnangataha.
Meghalaya a·doko MDA sorkario bak ong·paenggipa dilgiparangko, dingtang dingtang board-ni chairman, vice chairman, deputy chairman aro sorkarini adviser ba dingtang dingtang gadangni kamrango rakkianichi a·dok sorkari bang·bea tangka paisarangko koros ka·e galna nangengon, ia dilgiparangko kamo rakkianio ‘maming ong·gijani dongja’ inesa a·dokni Chief Minister Conrad Sangma aganskaahachim.
Sorkarini dingtang dingtang kamrango rakkiako man·gipa politician-rangoni mitamrangde gital aro gitcham MLA-rang, MDC-rang aro gipin politician-rangba ong·a aro uamangoni bang·batan Category A+, A aro B Category-ni ning·o rakkiako man·enggiparangsa ong·e, bang·en dormaharang baksana gipin man·gnirangkoba man·tokengachim.
Dingtang dingtang chairman, co-chairman, vice chairman aro deputy chairman gita dakgipa gadangni kamrangna re·anggipa bilsiosan a·dok sorkari, man·gnirangko aro dingtang dingtang cholrangkoba bariatahachim aro uandaken A+ gadango rakkiako man·giparang japrako gong 20,000/- dormaha baksana jaantian petrol/diesel litre 250, una on·gipa garini korosna gong 15000, indin sanna banani cholrang aro uandakgipa man·gnirangko da·o man·engahachim. Apsan daken A, B aro C category-o rakkiako man·gipa manderangba dingtang dingtang man·gnirang dongachim.
Indake ong·engon, NPP-chi dilenggipa MDA sorkari, ma·mongo BJP-ni kam ka·ani bewalrangko ja·rikesa a·dok sorkariko chalaienga aro a·doktangni manderangkode nichanggalenga ineba Gambegre-ni Congress MLA matnangataha.