SHILLONG: Meghalaya a·doko damgittam Common University Entrance Test (CUET) centre-rangko National Testing Agency (NTA) kulie on·na ku·rachakataha.
A·dokni Education Minister Rakkam A Sangma-ni parakatani gitade, ia damgittam CUET centre-rangoni damgniko Shillong-o aro damsakode Tura-o kuligen ine NTA-ni director, una u·iataha.
Undergraduate (UG) gadangni chatro chatrirangna dambonga CUET centre-rangko on·china a·dok sorkari bi·atahachim indiba da·o dipet damgittam CUET centre-rangkosan kulie, chatro chatrirang bang·batahaosa CUET centre-rangko kulidape on·na NTA u·iatskaaha.
CUET porikkako March jaon ong·atna tik ka·manahachim ine nikna man·a.
Admission-ko ra·na gita CUET-ko sena nangtelengani gimin janapatengon, chatro chatrirang bang·batan CUET porikkako sejaengani a·sel university-rango seat-rangko man·tokjaenga ine Education Minister parakataha.
“NEHU Vice Chancellor-ni angna u·iatani gitade, chatro chatrirang CUET porikkako sejaengani a·sel university-o seat-rang bang·en bangbang dongna nangenga,” ine Sangma aganaha.
Captain Williamson Sangma State University-ko kulianichi chatro chatrirangni neng·nikanirangko namatna man·gnok ine janapatengon, chatro chatrirang, ia State University-ni ning·o donggipa college-rango admission ra·na man·skagnok ine Education Minister parakataha.
Central university-rango UG aro Post graduate-ko dakna sikenggipa chatro chatrirangkode CUET porikkako sechina gita ua didiataha.
Education Minister-ni aganani gitade, batanggimin bilsirango central university-rango poraina sikenggipa Meghalaya a·dokni chatro chatrirang CUET porikkako sena nangjachim indiba ia bilsiode CUET porikkako setelna nangskaengaha.