TURA: Central Reserve Police Force (CRPF) North Eastern Zone-ni Assistant Director General (ADG) Binod Kumar Singh, March-ni 5 aro 6 tarikrango, Tura-o donako man·enggipa 120 Battalion CRPF-ona re·baenba, ia battalion-ni sipairangko grongangaha.
120 Bn CRPF-o kamko ka·enggipa sipairangni neng·nikanirangko ma·sie ra·na gita ADG, ia biapona re·baaha.
CRPF-ni gipin battalion-rango gita ong·gija 120 Bn CRPF-ni camp-rangde Tura Dakkopgre-ni dingtang dingtang biaprangosa ong·ani gimin ua ia pilak camp-rangkon re·roroe niangaha.
Tura-ni Danakgre jolo 120 Bn CRPF-na ra·gimin a·akoba CRPF NE Zone-ni ADG niangjolaha aro sipairangni neng·nikanirangko chel·chakna gitaba ku·rachakaniko on·angaha.
CRPF NE Zone-ni ADGP, gipin officer-rang baksa dingtangmancha 120 Bn-ni sipairang baksa ‘Sainik Sammelan’ ba tom·anikoba ong·atangaha aro ia tom·anio 120 Bn-ni sipairang, an·tangtangni neng·nikanirangko ADG-na parake on·na gita cholrangko man·aha.
Uni ja·man, Meghalaya Police, BSF aro gipin sipai dolrang baksaba ua tom·aniko ong·atangaha aro ia tom·anio, Western Range-ni DIGP Raghavendra Kumar, BSF-ni DIGP, BSF-ni Commandant-rang aro dingtang dingtang police officer-rangba bak ra·angtokaha.
120 Bn CRPF-ona re·bae, sipairangna ka·dongatani kattarangko aganangahani gimin CRPF NE Zone-ni ADG-ko dingtangmancha 120 Bn CRPF-ni Commandant PK Singh mittelpilatskaaha.
