TURA: Game ge·e cha·enggiparangna mi misi, me·su samjak aro ma·manti bolam biterangoniko dingtang dingtang cha·ani ringani bosturangko tarina gita skie on·na dingtangmancha training program-ko re·anggipa Budbar salo, North Eastern Hill University (NEHU) Tura Campus-ni ning·o donggipa Agribusiness Management & Food Technology Department-ni gita Darechikgre songo ong·atangaha.
Ia training program-o game ge·e cha·giparang gimik sak 70-mangni gita bak ra·angtokaha aro uamangna Agribusiness Management & Food Technology Department-ni chatro chatrirang, komila jam, strawberry jam aro uandakgipa cha·anirangko tarina skie on·angan baksana tarigimin cha·ani bosturangko pack ka·ani, bading chiwalatani aro uandakgipa kamrangni bidingo agan-talate on·angtokaha.
Ia program-o NEHU-ni Vice Chancellor Prof PS Shukla, mongsonggipa sokgipa ong·e jinmana aganprakangengon, agri-tourism-chi gama ge·ani cholrang, FPO-rangko kuliani aro joltango man·gipa bolam bite aro me·surangoniko ma·manti bosturangko tariani bidingo aganangaha.
Ia training program-ko ong·atanio dongpae jinmana aganprakanggipa gipin manderangara, NEHU Tura campus-ni Campus Director Prof Sujata Gurudev, Agribusiness Management & Food Technology Department-ni HoD Prof Deepak Bhagat, apsan department-ni Assistant Professor Dr Gino A Sangma aro gipinrang ong·a.
