TURA: India a·songni chinirangko niam gri Bangladesh a·songona badingsrukatengani gimin aro Bangladesh a·songoniko gue granrangko India a·songona badingsrukbaskaengani gimin South Garo Hills a·jani Nongalbibra jolo donggipa dingtang dingtang NGO-rang, chong·motan ACHIK, FKJGP, GSMC, AYWO aro AOSW dolrang matnangatenba, iandake chini aro gue badingsrukaniko champengchina South Garo Hills a·jani Deputy Commissioner-na sedoataha.
NGO-rangni parakatani gitade, Garo Hills-ni dingtang dingtang ramarang gita a·songni chinirangko Bangladesh a·songona badingsrukatengon, Meghalaya aro samba jolrango donggipa dingtang dingtang a·dokrangonikoba chinirangko badingsrukatengani a·sel Meghalaya a·dok aro gipin a·dokrangba noksan ong·atako man·na nangengachim.
“A·songni chinirangko niam gri Bangladesh a·songona badingsrukatengani a·sel a·songni manderang noksan ong·na nangengani gimin ia kamko chinga raken jegalatenga aro iandake Bangladesh a·songona chini badingsrukataniko ta·raken champengchina didienga,” ine Nongalbibra-ni NGO-rang, South Garo Hills a·jani DC-na seatgipa chittio parakataha.
Bangladesh a·songni gue gran (supari)-rangko Baghmara aro Rongara-oni Damra-ona dakanggipa rama gita a·songona badingsrukbaengani a·sel Garo Hills-o gue bagan dake cha·enggipa manderang an·tangtangni guerangko dam komiao palna gita nangtokenga ine janapatengon, Bangladesh-oni guerangko India a·songona badingsrukbaaniko ta·raken champengatchina gita Deputy Commissioner-ko didiataha.