TURA: West Garo Hills a·jani Phulbari jolo donggipa Upper Shyamnagar songo rice mill ba mi su·ani karkanako chalaienggipa mande sakgittamna FEDCO, nangana bate bijolini bill-rangko sokataha ine matnangataha.
Koborko on·ani gitade, ia jolrango chalaienggipa rice mill-rang japrako gong 2000-3000 dakerangsan bijoli bill-rang sokrongaiachim indiba ia jolo rice mill-ko chalaienggipa saksa Methola Rabha-na, jasaon gong 78,000-ni bill sokskaaha.
“Iandake bill-rang bate sokahani gimin anga meter-ko tik ka·enba jaantian iako see rakkiaha. Meter-ode jaantian apsan ong·e sokengoba batanggimin ja 6-7-mangna angna bijoli bill-ko bang·bate sokatskaaha. Iani bidingo FEDCO talataniko on·na nangchongmota,” ine rice mill-ko chalaienggipa Methola Rabha aganaha.
Iandake batanggimin ja 6-7-mangna bijolini bill rakbate sokengani a·sel uni nokdang neng·nikanirangko chagrongna nangengaha ineba ua aganaha.
“Chinga jaantian Phulbari office-ona re·ange iani bidingo sing·sandierongaha aro uamang Shillong-osa iako ka·sretenga ine agane, iako ta·raken namdapatna ku·rachakahachim indiba da·alonan maming dingtangani gri bijoli bill sokkuenga,” ine Rabha aganaha.
Ia jolo rice mill-ko chalaienggipa sakgipin Ratan Marak-ba apsan daken, jao gong 10,000-mangni gita bijoli bill sokenga ine matnangataha.
Marak-ni aganani gitade, uni meter-o ‘zero’ mesokgenchimoba jaantian una bijolini bill-de gong 10,000-mang ong·pile sokskaengachim.
“Angaba iani bidingo Phulbari office-ona re·ange sing·sandion uamang iako ta·raken namatna jotton ka·gen ine ku·rachakatahachim indiba da·o jadokni ja·manba maming dingtanganirang dongkujaenga,” ine Marak aganaha.
Ia jolo rice mill-ko chalaienggipa sakgipin Uttam Kr Rabha-ba an·tangni suk ong·gijaniko parakatengon, japrakon una gong 15,000-mang ong·e bill-rang sokskaenga ine janapataha.
“Angni bill-o unit-rangkode 0 mesoka indiba gamna nangade gong 15,000-mang batskarongenga. Badiaba bill-rangode angni jakkalgipa unit-ko 2200 unit ine mesokskaa indiba angni chalaienggipa rice mill-ara indita bijoliko jakkalna nanggipa karkanaba ong·jachim,” ine Rabha aganaha.
Iani bidingo sing·sandiaton, bill-rangko tarianio gualanirang dongbebea aro bill tarianiko ta·raken namdapatna kam ka·gen ine FEDCO official-rang parakatskaaha.