SHILLONG: Meghalaya a·doko rong·mesak bikotna gita a·dok sorkari on·jawa ine Mongolbar salo, a·dokni Chief Minister Conrad K Sangma ku·rachakaniko on·ataha.
Meghalaya a·doko rong·mesak bikotna on·taienga ine matnangenba, dolsa NGO, ma·mong sorkarina sedoatahani gimin Chief Minister, iana aganchakaniko on·ataha.
“Je dolba ma·mong sorkarina sedoatna man·aigen aro anga darangkoba iana champengna man·jawa. Indake ong·genchimoba, a·dok sorkari rong·mesak bikotna on·enga ong·ja,” ine Chief Minister, kobor ra·timgiparangna aganaha.
A·doko songdongenggipa manderangni nangnikanirangko ra·chenggija aro niamo pangchake bikotani cholrangko nichenggijade maming dakeba a·doko rong·mesakrangko bikotna gita sorkari on·jawa ineba Chief Minister parakataha.
“Manderangni janggirang aro an·seng baljokanian ia sorkarini mongsonggipa daito ong·a ine a·bachengon chinga aganmanaha aro a·dokni namgnina chinga maming dakeba manderangni nangnikanirangko ra·chenggija aro niam gita bikotani cholrangko sandichenggijade rong·mesak bikotna on·jawa,” ine Sangma aganaha.
Mitam manderang ba dolrangde a·doko rong·mesak bikotaniko a·bachengatna nangnikgiparangba dongenggenchim ine janapatskaengon, iani bidingo name simsakesa ja·kurangko de·na nanggen ine Chief Minister parakataha.
“Oe beben mitam manderang ba dolrangde iako nangnikengnaba gnang indiba angni agangimin gita manderangkoba ia kamo bak ong·atna nanggen aro rong·mesak bikotaniko a·bachengatanichi mai nangchakeanirang donggen, ia pilakkon che·em che·em am·sandichengna nanggen. Uni gimin iarangko name am·sandichenggijade a·doko rong·mesak bikotaniko a·bachengatna man·jawa,” ine Sangma aganaha.
Rong·mesak bikotani bidingo ma·mong sorkarioniba, a·dok sorkarina maming u·iatanirang dongkujaenga ineba Chief Minister parakataha.