TURA: Burma a·songoni gue gran (supari)-rangko Bangladesh gita Meghalaya aro Assam a·dokrangona badingsrukbaani da·o adita komiangahani gimin Garo Hills-o gue bagan dake cha·enggipa manderangni obostarang adita namkalbana a·bachengaha ine kobor on·aha.
Burma a·songni gue granrangko South Garo Hills, South West Khasi Hills aro West Khasi Hills a·jani sima gita India a·songni dingtang dingtang biaprangona badingsrukbaengani a·sel Garo Hills-o gue bagan dake cha·enggipa manderang noksan ong·na gita nangtokengachim aro iani bidingo dingtang dingtang dolrang raken jegalanirangko daktokahachim.
Uandaken da·o gue badingsrukbaanirang komiangahani gimin Garo Hills-o gue bagan dake cha·enggipa manderang an·tangtangni guerangko palna gita man·taiengaha ine kobor on·aha.
Gueni dam re·anggipa bilsiona bate changgni komiahaoba, gue bagan dake cha·enggipa manderang, gue badinggiparangna palna gita man·taiengaha.
Batanggimin antirangode gue bagan dake cha·enggiparang, an·tangtangni guerangko palna man·jae namen neng·nikanirangko chagrongna nangtokahachim aro mitam biaprangode guerang indin ga·ake bon·aiahachim.
Burma a·songoniko niam gri gue badingsrukbaengani a·sel Garo Hills-o gue bagan dake cha·enggiparang noksan ong·na nangtokengani gimin adita salrangna skangsan a·dokni gitcham chief minister aro AITC-ni dilgipa Mukul Sangma-ba iani kosako jegalaniko mesokna signature campaign-ko ong·atangahachim aro iani bidingo ma·mongni gita inquiry-ko dakchinaba ua dabiangahachim.
Indake ong·engon, da·ororo SGH, SWKH aro SWKH a·jarangoni gue salbaanirangko nikna man·jaengaha ine Rongjeng-oni kobor on·timgiparang u·iataha.