WILLIAMNAGAR: Lok Sabha election-ko re·baenggipa April jani 19 tariko ong·atengani gimin East Garo Hills a·jaoba licence gnang silchidare jakkalenggipa pilak manderangkon an·tangtangni silchidarerangko donatgimin executive magistrate, Superintendent of Police (SP), sepangbatgipa police station ba OGC-rangona ra·bae donechina gita East Garo Hills a·jani District Magistrate, CrPC-ni Section 144 aro Arms Act 1959-ni Section 17 (3), (a) aro (b)-ni ning·o u·iataniko on·ataha.
Silchidarerangko salsnini gisepon donechina gita u·iatengon, ia dongimin somoi gita silchidarerangko kosako janapgimin official-rang ba police station-rangona ra·bae donejagenchimode CrPC-ni Section 25 1B(h)-ni ning·o sastirangko man·gen ine District Magistrate mikrakataniko on·ataha.