TURA: South Garo Hills a·jani Nokatgre songo ro·ong quarry bikotaniko South Garo Hills a·jani GSU Karukol regional unit aro dingtang dingtang dolrang jegaltokengon, ia quarry-ko ua nangchongmotgipa lekkarang aro authority-rangni permission-ko man·chengesa bikotenga ine quarry nokgipa Greneth M Sangma parakatskaaha.
Nokatgre songo mingsinggipa Renang Dare dongani gimin aro ia biapo ro·ong quarry bikotna sienggipa biapara ia songo donggipa nokdang ge·bongani gue baganrangkoba man·chapenga ine dingtang dingtang dolrang, ia biapo ro·ong quarry bikotaniko raken jegaltokengachim ine nikna man·a.
Indake ong·engon, ia biapo ro·ong quarry bikotaniko jegalaniara aro uni kosako matnanganiara maming pangchakani gri uko mikbue matnanganirangsan ong·aia ine Sangma parakatskaaha.
Ia ro·ong quarry-ko bikotna gita ua bilsi gittam neng·bee kamrangko ka·ani ja·mansa permission-rangko man·aha ine janapatengon, “Ia permission-ko tarina angna songni Nokma aro mahari ku·mongesa on·aha aro uni ja·man DFO-niko permission bi·on, ua an·tangan inquiry-ko dake, survey ka·a matchotani ja·man Non-Forest Land Certficate aro uni ja·man Forest Clearance Certificate-koba angna on·aha. Iarangko Scientist-rangan inquiry dake scientific mining-na plan-rangkoba tariaha. Uni ja·man State Level Expert Appraisal Committee (SEAC) expert-rangna watate meeting ka·enba, ia biapara Nokrek National Park Eco Sensitive Zone-oni badita chel·a ine Tura Wildlife DFO-ni NOC-ko bi·ate NOC-ko on·ani ja·mansa State Environment Impact Assessment Authority (SEIAA)-ona forward ka·atenba committee-ni gita chanchie Environment Authority-rang Clearance-ko on·aha. Bon·kame NGT-ni gita Meghalaya Pollution Control Board-ni Consent to Establish Certificate-ko issue ka·ani ja·man ‘Consent to Operate’-ko on·aha,” ine Sangma talataniko on·ataha.
Songsalna dangdike on·pagipa saksa ong·e ua ia ro·ong quarry-ko bikotna kam ka·anio pilak niamrangko ja·rikesa licence aro permission-rangko tariaha ineba Sangma parakataha.
Ia ro·ong quarry-ko bikotanichi samtangtango donggipa chiring chibisik aro pilak ong·telaigiparangna nangchakeaniko ra·bagen ine dingtang dingtang dolrangni jegalenganina aganchakaniko on·angskaengon, “A·chikrangni a·ba o·e cha·ani kamrangan skanggipa samtangtango ong·telaigiparangko nisigipade ong·enga. Ia chonbegipa ro·ong quarry-ko kulianichi samtangtango ong·telaigiparangna badita nosto ka·aniko ra·baskagen?” ine quarry nokgipa sing·doataha.
South Garo Hills a·jao niamo pangchake ro·ongrangko bikotna permission-ko on·ahani gimin ua songni manderangko aro sorkarikoba mittelpilataha.
“South Garo Hills-o niam gita ro·ongrangko bikotgipa quarry-rang dongkujani gimin neng·nikanirangko nikesa permission-ko on·aha aro South Garo Hills-o highway-rang, dal·dalgipa building-rang aro dolongrangko rikanio ro·ongrangna dilaniko 80 percent-ni gitade namatna man·gnok,” ine Sangma parakataha.
Uni kosako mikbue matnanganirangko bebera·jachina aro iani bidingo name chanchie nipiltaichina gitaba ua South Garo Hills a·jani manderangko mol·molataha.