SHILLONG: Dingtang dingtang dolni dilgiparangba National People’s Party (NPP)-o naptokengahani gimin vote man·aniba batroroengaha aro ia Lok Sabha election-oba NPP-ni candidate, Shillong parliamentary constituency-o chegipa ong·telgen ine NPP-ni national general secretary aro a·dokni Deputy CM Sniawbhalang Dhar parakataha.
“Ia election-o chinga chegipa ong·telaigen aro chingo maming jajaaniba dongja,” ine ua aganaha.
NPP-ni vote man·ani namen tang·doangaha ine janapatengon, “2023 bilsio NPP-ni vote man·ani lak 3.17-ona tang·doangaha aro PDF-ni MLA sakgni, chong·motan Banteidor Lyngdoh aro Gavin Mylliem baksana Carnes Sohshang aro Batshkem Ryntathiang-ni bakrimanichiba NPP-ni vote man·ani tang·dobatangaha,” ine Dhar parakataha.
Gitcham MDC Rona Khymdiet-ba March-ni 22 tariko NPP baksa bakrimena sienga ine janapatengon, NPP-ni vote man·ani da·o lak 1-chi batangengjok ine NPP-ni dilgipa parakataha.
NPP-ni me·chik sakgniko ia Lok Sabha election-o susaataniara me·chikrangko mangrakbatatani ong·ja indiba chol dongteljae dakanisan ong·aia ine Shillong-ni Congress MP Vincent Pala-ni matnanganina aganchakaniko on·angskaengon, uamang Shillong-o cabinet minister-ko susaatenga maina ua Congress-ni candidate baksa bilake susagrikna sienga ine Dhar aganaha.
“Chinga candidate-rangna dilenga ine na·a chanchiama? Unbaksa susagrikna chingo candidate nambatgipan donga. Uni giminsa chinga chanchirima ia ja·kuko de·aha aro Shillong seat-ko Ampareen chetelgen,” ine Dhar aganaha.
Batanggimin bilsidokni gisepo MDA sorkarini chu·sokatgipa kamrangni gimin janapatengon, “MDA sorkarimangmangsan kamrangko ka·e da·o gital Shillong songjinmako ong·katatna man·aha ine manderang nikaha. Rama jal·langrangko niatgenchimode chinga ia bilsidokni gisepo kror 10,000-mangni gita koros ka·aha aro na·simang dingtang dingtang namroro silroroaniko mikrontangchin nikna man·enga,” ine ua aganaha.
MDA sorkarini iandakgipa kamrangni a·selan 2023 bilsini Assembly election-o NPP, dam 26 seat-rangko chena man·aha ineba NPP-ni national general secretary parakataha.
“2018 bilsio NPP, dam 19 seat-rangko cheaha indiba 2023 bilsiode dam 26 seat-rangko cheaha. Ia pilakan sorkarini kamrangni giminan ong·a ine anga bebera·a. Oe beben chinga sakantikode kusi ong·atna man·ja indiba a·dokna aro mongsongbate chadamberangna namroro silroroaniko ra·bana gita chinga rakbee kamrangko ka·enga,” ine Dhar aganaha.
MDA sorkarini jako ra·chengani somoio a·dokni budget gong crore 9000-san ong·kuengachim indiba da·alo gong crore 27,000 ong·aha ine Dhar parakataha.