AICC-ni account-rangko BJP sorkari dondipatani a·sel neng·nikaniko man·enga: Pala

SHILLONG: All India Congress Committee (AICC)-ni ge 11 account-rangko ma·mongo BJP-chi chalaienggipa NDA sorkari ‘freeze’ ba champengatani a·sel ia Lok Sabha election-o Congress dol neng·nikanirangko chagrongna nangenga ine Bristibar salo Meghalaya Pradesh Congress Committee (MPCC)-ni president Vincent H Pala, Shillong songjinmani Congress Bhawan-o Congress membor-rang baksa tom·e chanchirimani ja·man, kobor ra·timgiparangna parakataha.
Pala-ni aganani gitade, AICC-ni ge 11 account-rangko BJP sorkari chipe donatani a·sel ia Lok Sabha election-o Congress dol, tangka paisani gita neng·nikanirangko chagrongna nangenga.
“Ia chang election, gipin chang election-rang gita ong·janaba dongaha maina AICC-ni ge 11 account-rangko BJP sorkari ‘freeze’ ka·aha. Ia account-rango kror 215-na baten dongengnaba gnangchim aro ia account-oniko gong kror 115-mangni gita income tax account-ona okdrae ra·aha. Uni gimin ia election-o chinga tangka paisani gita neng·nikani gnangsa susaenga,” ine Pala aganaha.
BJP baksa susanagipa Congress dolmangmangsan dongaia ine ma·siesa BJP dol, iako dakaha ineba Pala aganaha.
MPCC president-ni aganani gitade, batanggimin jarango Congress dol, manderangonikoba on·gilanirangko ra·aha aro Shillong-ni bang·a manderangan tangka paisarangko on·giltokaha.
Ia tom·anio uamangni chanchianirangko talate on·angengon, “Chinga Shillong parliamentary constituency-ni ning·o donggipa pilak district aro block president-rangko okamataha. Iandakgipa tom·anirangko chinga pangnan election-ni tarik aro candidate-rangni bimingko parakatani ja·man ong·atronga. Shillong-na angko seokaha aro Tura-na Saleng Sangma-ko seokaha. Uni gimin ia election-o bilake dakgrikna gita chinga district president aro block president-rangna ge·etaniko on·ataha,” ine Pala aganaha.
Ia Lok Sabha election-o gipin dolni worker-rang aro candidate-rang baksa dinggrikanirangko dakjachina gitaba ua ge·etaniko on·ataha ineba MPCC-ni president parakataha.