SHILLONG: Ri Bhoi a·jani Jirang constituency ning·o donggipa Maikhuli aro Hawla songrango ka·enggipa kamrangko Assam sorkari champengattaiani a·sel a·dok damgnini simarango so·sojengjeng ong·aniko nikna man·taiaha.
Koborko on·ani gitade, Assam-ni sorkari official-rang, Maikhuli songo na·tok jilchakgipa pokkrini signboard-ko ra·gale galeaha aro Hawla songoba Water Resource Department-ni dingtang dingtang project-rangko champengeaha.
Ia song damgnio Assam sorkarini official-rang iandake ja·kurangko de·ahani gimin songni manderang aro Jirang-ni MLA Sosthenes Sohtun-ba Assam sorkarini kosako raken jegalanirangko dakangaha.
Hawla aro Maikhuli songrangona Sohtun an·tangan re·ange songni manderango sing·sandie ra·eaha aro iani bidingo bakan a·dokni Chief Minister Conrad K Sangma-na u·iatenba, Assam sorkari baksa agangrikatchina didiataha.
Iani bidingo ning·tue am·sandianirangko dakenba nanga gita ja·kurangko de·china ua, Ri Bhoi a·jani deputy commissioner aro superintendent of police-naba ge·etaniko on·ataha.