TURA: Ia chang Lok Sabha election-o Garo Hills-ni manderang, gipin political dolni candidate-ko MP-na seoke watatgenchimode dal·en gimaani ong·gen ine Bristibar salo, Tura-ni MP aro National People’s Party (NPP)-ni candidate Agatha K Sangma, North Garo Hills a·jani dingtang dingtang biaprango campaign ka·engmiting somoio aganaha.
Bristibar salo, NPP-ni candidate Agatha Sangma, NPP-ni national president aro a·dokni Chief Minister Conrad K Sangma baksa North Garo Hills a·jani Chisimari, Keragalram aro uandakgipa dingtang dingtang biaprangona re·ange tom·anirangko ong·atahachim.
Ia Lok Sabha election-o Garo Hills-ni manderang, gipin dolni candidate-ko MP-na seokgenchimode dal·en gimaani ong·gnok ine janapatengon, ma·mongo BJP-chi dilenggipa NDA sorkario NPP-ba bak ong·paengani giminsa Meghalaya a·dokna bang·en namroro silroroaniko ra·bana man·aha ine Agatha aganaha.
Tura-ni MP ong·e ua Garo Hills-ni nanganirangko ma·mong sorkarina ku·rang on·na man·aha ine janapatengon, batanggimin bilsidokni gisepo ua NPP-chi dilenggipa Meghalaya sorkari baksa nangrime bang·en namroro silroroaniko ra·bana man·aha ine Tura MP aganaha.
A·doko namroro silroroaniko ra·badapangkuna man·na gita an·tangko seokpiltaichina gitaba ua jolni manderangko didiangaha.
Ia tom·anirango NPP-ni national president aro a·dokni Chief Minister Conrad K Sangma-ba jinmana aganprakangengon, North Garo Hills a·jao NPP-chi dilenggipa sorkari, pilakni gitan namroro silroroaniko ra·baahani gimin jolni manderang, NPP-ni candidate-kon seoktaigen ine an·tangni ka·dongchakenganiko parakangaha.
A·songni Prime Minister Narendra Modi aro ma·mong sorkarini gipin dilgiparang, uni pagipa PA Sangma sagiko mande ra·ani giminsa Agatha Sangma-ni nanganirangko chu·sokate on·na gisiko nangbatenga ineba ua aganaha.
Gipin candidate-ko seokgenchimode Garo Hills-na gimaani ong·gen: Agatha
Date:
Share post:
