SHILLONG: Adita salrangna skang, Ichamati-o Citizenship Amendment Act (CAA)-ko jegale KSU aro gipin dolrangni jinma tom·bimonganiko ong·atani ja·man, mande sakgniko so·ote galanio jak donggipa adita sak manderangko police-rang ma·siaha ine Sonibar salo, a·dokni Chief Minister Conrad K Sangma parakataha.
Chief Minister-ni parakatani gitade, ia a·selni bidingo police-rang bilaken kamko ka·enga aro ia a·selo jak donggipa adita sak manderangkoba ma·sina man·aha.
“Ia a·sel ong·anio jak donggipa adita sak manderangko chinga ma·sina man·aha aro da·o uamangko rim·na sandiengaha. Chinga niamo pangchakesa ja·kurangko de·enga aro je manderangan ia a·sel ong·anio jak dongachim, ua manderangko chinga rim·e nanga gita sastirangko on·gen,” ine Sangma aganaha.
Da·o dipet ia a·selni bidingo darangkoba rim·kujaengani gimin sing·on, ia a·selo jak donggipa manderangko rim·na sorkari bilaken kamko ka·enga aro dos donggipa adita sak manderangko ma·sina man·aha ine Chief Minister parakataha.
Re·anggipa Budbar salo, East Khasi Hills a·jani Shella constituency ning·o donggipa Ichamati-o mande sakgniko so·otani ja·man, ia jolrango so·sojengjeng ong·anirangko nikna man·engachim.
Da·o dipet ia a·selni bidingo darangkoba rim·na man·kujaenga ine Sonibar salo East Khasi Hills a·jani police-rang parakatahachim.
Re·anggipa Budbar salo, CAA-ko jegale KSU aro dingtang dingtang dolrangni tom·aniko ong·atangani ja·man Ishan Singh aro Sujit Dutta minggipa mande sakgniko ma·sina man·gijagipa manderang so·ote galangahachim.
