TURA: West Garo Hills a·jani Shyamnagar songo Jal Jeevan Mission (JJM)-ni kamrangko name chu·sokatjahani a·sel songni manderang chu·onga gita chirangko man·tokjaenga ine songni manderang, Phulbari-ni MLA aro a·dokni Power Minister AT Mondal-na badi ka·doataha.
Iani bidingo Phulbari constituency-ni MLA AT Mondal-na badi ka·e sedoatengon, Shyamnagar jolrango JJM-ni kamko jako ra·e ka·gipa contractor, kamrangko name ka·jahani a·sel songni nokni manderang, chu·onga gita chirangko man·tokjaenga ine songni manderang matnangataha.
“A·song gimiko donggipa nokdang ge·antinan rongtalgipa chirangko chu·onga gita on·na miksonganiosa ia JJM-ko ma·mong sorkari a·bachengate on·ahachim indiba Shyamnagar songode ian bikpilsa ong·skaenga. Ia JJM-ni ning·o rikna nanggipa aro teke on·na nanggipa pipe-rang chu·ongjani a·selan songni manderang chirangko man·tokjaenga,” ine songni manderang parakataha.
Chirangko chu·onga gita man·tokjaengani a·sel songni manderang neng·nikanirangko chagrongna nangtokengaha ine janapatengon, iani bidingo ta·raken ja·kurangko de·china aro songni manderangna chu·onga gita chirangko sokate on·china songni manderang, Phulbari MLA-ko didiataha.
