TURA: Re·anggipa jao, South Garo Hills a·jani Karukol samba jolo donggipa Rongdik songo, rama tarienggipa company-ni mande saksako rim·gittanganio jak donggipa sakgipin mandeko police-rang rim·na man·aha aro ia a·selna rim·ako man·gipa manderang da·o sakgittam gapaha ine kobor on·aha.
Re·anggipa March jani 20 tariko, rama tarienggipa company-ni mande saksako adita sak manderang, uamangni dongchakenggipa a·tiponiko rim·gittangangahachim indiba rim·gittanga man·gipa mandeko police-rang bakan jokatpilenba, ia mandeko rim·gittanganio jak donggipa sakgni mandekode rim·na man·ahachim.
Ia mande sakgni baksana Akhilesh Chauhan-ko rim·gittanganio gipin sakgni manderangba jak donga aro uamangko police-rang rim·na sandienga ine South Garo Hills a·jani SP Shailendra Bamaniya parakatahachim.
Indake ong·engon, kate dongnuenggipa mande sakgnioni saksakode police-rang, Budbar salo rim·na man·aha aro ia mandeara gital dake bikottaina jotton ka·enggipa Garo National Liberation Army (GNLA)-ni bakan ong·achim ine police official-rang kobor on·ataha.
Rama tarigipa company-ni mandeko rim·gittanganio jak donggipa sakgipin mandekoba da·o police-rang rim·na sandiengkua ine u·iataha.