SHILLONG: Bristibar salo Arunachal Pradesh-o Conrad K. Sangma-ni garirangko ja·rikangpa-gipaoniko tangka kror 1-ko rim·gipani bidingo chu·-gimik am·sandianiko dake on·china Congress dabiaha.
Iani bidingo Election Commission of India baksa bilakgipa matnanganio gapatangna party kam ka·enga ine Sukrobar salo kobor ra·timgiparangna Meghalaya Pradesh Youth Congress-ni Vice Presi-dent, Banphiralang Basaiawmoit aganaha.
Tangkarangko Assam-o register ka·gipa AS-01-ET-5252 Fortuner garionniko man·aha. Ian Sangma-ni official garirangoni ong·ja, indiba gari sepangchap-chap ja·rikgipa ong·a.
Badri Rai Construction Ltd-ni executive director Harshvardhan Singh-ni gari ong·a jean NPP-ni rikenggipa MDA sorkari-ni gita dingtang dingtang dal·dalgipa project-rangko jako ra·e ka·angna on·gipa ong·a jeon Mawdiangdinga-o ruuta somoioni rikenggipa Assembly building project aro Polo-o commercial complex-rang ong·a.
Project-rang jekai Assembly nok rikgipa aro P.A Sangma Stadium, Meghalaya-o apsan dolchi rikenggipa ong·a ine ma·sie ra·china Basaiawmoit manderangko didiangaha. Aro ua jaksi ote mesokang-kuaha, jeon namgija dake tarigiparang scanner-ni ning·o rikenga.
“Party donmitape kam ka·na miksongenga indiba chinga namen bebe ra·a jeon nanga dot-rang baksa nangdima ong·ode, bagipao kakketko tol·enga na·a sandie man·aigen,” ine ua Badri Rai Group-na dingtang dingtang dal·dal-gipa kamrangko ka·na on·gipa MDA sorkarini kosako aganangaha.
Tangka cha·bokgipa-rangoniko jakkalenga ba election-ni kamrangna jakkalangenga, ine Basaiawmoit Model Code of Conduct ong·engani somoio ECI-ni niamrango tangka hajal 50-na bate ra·bitna man·jani gisepo NPP-ni dilgiparang niamko pe·anina matnange aganangaha.
Bilo manderang je biaponiba uamang ong·-chong uamangni bil jakrangko sa·alatenganichi Meghalaya salantian ga·akangenga, ua authori-ty-rangko sing·angaha ia a·sel ong·gipako carpet ning·ona itroke galnape donjachina indiba iani mamlao am·sandianiko dakangchina didiangaha.
“Authority-rang kam ka·anggen ka·angjagen, ia manderangni uamangni bil jakrangko sa·altengani mikkango manderang satkapaniko on·anggen,” ine ua aganaha.
“Chinga bebe ra·a jeon kragipa am·sandianiko dakanggen. Chinga kakket ong·kataniko nangnika. Da·ode manderang goka ong·jaha,” ine ua agandap-angaha. Tangka kror 1 man·gipana Trinamool Congress-ni a·gipi dilgipa Mukul Sangma kragipa sakkiko on·china bi·angaha.
“Ian chanchininge dakgipa ong·a jeon salanti scnanning ka·aoniko jokna gita campaign ka·na re·anggipa garirang baksa jarikangaha. Salantian garirangko check ka·na nanga aro campaign-na re·anggiparangko check ka·na nangchongmota,” ine ua sakkiko gimaatjana chanchiani dongatjana niamko ja·rikangna nang-chongmotako aganangaha.
Tangka kror 1 man·gipani bidingo Voice of the People Party aganna jechakangaha, dot-rang baksa nangrimna voter chu·onga gitan gisik senga aro uamang April 19 tariko aganchakaniko man·anggen, ine uamang aganaha.
