SHILLONG: North-Eastern Hill University Students’ Union (NEHUSU), mija Sukrobar-o ma·mong sorkarini Citizenship Amendment Act (CAA)-ko ra·gataniko jegale Prime Minister Narendra Modi aro Union Home Minister Amit Shah-maangni bimangrangko tarie so·e jegalaniko dakaha.
Jegalgiparang CAA Rule-rangko see janapgipa king gipin lekkarangkoba so·aha.
Ra·gatenggipa CAA salgro-salaramni songpanggipa manderangna namen kenbegnigipa ong·a ine NEHUSU general secretary Banpynbiang Riang aganaha.
“Chinga pangpagijagipa jat manderang ong·enga. Da·o CAA-ko ra·gataha, Bangladesh-oni niam gri ma·branggiparangan chingna bate bang·batanggipa manderang ong·skana chinga kenchakenga,” Riang aganaha.Ra·gatenggipa CAA-ko a·joloni student dolni raken jegalani kattako watatna uamang nangnikenga, ua aganaha. Ma·mong sorkarini ia ra·gataniko uamang sikap tangkap jegalnasienga, NEHU-o research scholar Remon Longku, aganaha.
“Chinga jedakeba a·jolo ia Act-ko ra·gatna on·jawa” Arunachal Pradesh-oni Tangsa jatoni Longku aganaha.
Indake ong·engon, NEHU Law department-ni chatro, Kenny Kharbithai, salgro-salaramni manderang mamingdakeba Bangladesh-oni niam gri ma·branggiparangni bal-bojako chiljawa ine aganaha.
Ia neng·nikani donggipa law-ko namnikgijagipa manderangni ku·rangrangko knachakchina ua Ma·mongko aganaha. CAA-ko ra·gate a·jolni a·jarangko dingtangatgen, ua mikrakataha.
Ichamati-o ru·utgija salo ong·gipa a·selni bidingo aganpana jotton ka·anina NEHUSU, Vishva Hindu Parishad (VHP)-ko matnange chingni mamlani gimin na·a aganpanabe ine uko aganaha.
“VHP, niam gri ma·branggiparangko chel·chakna jotton ka·enga. Chingni a·jol ning·i neng·nikani ong·engon uamang aganpana maming bil dongja,” Riang VHP-ko matnange CAA-ni kosako jegalani ja·mano Ichamati-o ma·brange kam ka·gipa gipin jat sakgnini sianio aganpachina President Droupadi Murmu-ko didiaha.
