TURA: West Garo Hills a·jani Wadagokgre Archaeological site-o badiaba dolrang, dal·dalgipa kolrangko jakkale a·arangko cho·engani a·sel ia biapo ripinge rakkienggipa ma·manti bosturang nosto ka·ako man·engahani gimin ia biapo a·a cho·ani kamrangko ba uandake niam gri dakanirangko champengna West Garo Hills a·jani District Magistrate, Section 144 CrPC-ko ra·gatangaha.
Wadagokgre songara chengo pagitcham ma·gitchamrangni gam-jinrangko man·rikgipa biapsa ong·enba ia biapo donggipa ma·manti bosturangko ripinge donenggipa biapsa ong·ani gimin ia biapo dal·dalgipa kolrangko jakkale, niam gri a·a cho·aniko champengatchina gita Garo Hills-ni dingtang dingtang dolrang sorkariko didiatahachim.
Wadagokgre songo niam gri a·arangko cho·aniara ia biapo donggipa gamchatgipa gam-jinrangko nosto ka·e galani gitasan ong·aigija samtangtango donggipa chiring chibisikrangko nosto ka·ani gitaba ong·engachim.
Indake ong·engon, ia biapo niam gri a·a cho·anirangko District Administration champengatenba, Arts & Culture department ba Deputy Commissioner (DC) office-ni permission-ko ra·chenggijade darangba ia biapo napna man·jawa ine u·iataha.
Ia biaprango niam gri dakanirangko nirok sandichina aro niam pe·giparangko rim·a man·genchimode niamo pangchake rakgipa ja·kurangko de·china gita West Garo Hills a·jani District Magistrate, Law Enforcement aro Arts & Culture department-rangna ge·etaniko on·ataha.
