SHILLONG: Adita salrangna skang, Shillong Parliamentary Constituency-ni ning·o donggipa dingtang dingtang biaprango election campaign ka·engmiting somoio, chrik a·bokanirangchi golmal ka·na jotton ka·ahani gimin National People’s Party (NPP)-ni badi ka·aniko man·e, Voice of the People’s Party (VPP)-ni president Ardent Miller Basaiawmoit-na Shillong Lok Sabha constituency-ni Returning Officer SC Sadhu, show cause notice-ko ba a·selni bidingo agan-talataniko on·china u·iataha.
Adita salrangna skang, Jaiaw Pdeng-o aro Ri Bhoi a·jani Umsning-o NPP-ni election campaign ka·engmiting somoio, VPP-na chakenggipa manderang, ‘Ha u Prah’ ine chrik a·bokenba tom·aniko golmal ka·ahachim ine nikna man·a. VPP-ni iandake golmal ka·ani gimin NPP-ni manderangba uamangko champengna jotton ka·on, dolgnini gisepo adita nanggrikaha aro tom·aniko donsogimin somoina skangan dontongna nangaiahachim.
Iani bidingo VPP-ni president-na show cause notice-ko on·atengon, NPP-ni election-na tom·aniko VPP-ni membor-rang golmal ka·ahani gimin April-ni 12 tarik ba una skangan agan-talataniko on·china Shillong parliamentary constituency-ni Returning Officer ge·etaniko on·atskaaha.
Election-ni somoio political dolrangna aro candidate-rangna Model Code of Conduct (MCC)-ni ning·o dongimin niamrangni bidingo talataniko on·angskaengon, political dolrang aro candidate-rang, gipin poltical dolrangni ba candidate-rangni tom·ani ba re·jomanirangko champengjachina ba golmal ka·jachina gita niamrangko donahachim ine Returning Officer parakataha.
Returning Officer-ni talatani gitade, badiaba political dol badiaba biapo tom·aniko ong·atenga ong·ode, gipin political dolni manderang, ua biap gita re·jomna man·ja aro gipin political dolni tapgimin poster-rangkoba gipin dolni manderang chite galna man·jachim.
“Uni gimin nang·ni aganchakaniko on·na gita iachi cholko on·enga aro April-ni 12 tarik ba una skangan aganchakaniko on·china u·iatenga,” ine VPP-ni president-na on·atgipa show cause notice-o Returning Officer parakataha.