SHILLONG: National People’s Party (NPP)-ni dilgiparang, manderangni vote-rangko brena jotton ka·enga ine Shillong Lok Sabha constituency-ni Congress candidate Vincent H Pala matnangataha.
Shillong Lok Sabha constituency-ni biap damsao election campaign ka·engmitingo manderangna aganprakangengon, Jaintia Hills-ona re·ange campaign ka·engmiting somoio, songantion 2000 vote-rangko NPP-na man·e on·genchimode manderangna dingtangmancha boksisko on·gen ine NPP-ni state president aro a·dokni Deputy Chief Minister Prestone Tynsong aganahachim ine Pala matnangataha.
“Ian a·doko MDA sorkariko dilenggipa NPP-ni dilgiparangna namen kratcha·na nangani katta ong·a. Je songrangon manderang bang·batan Kristianrangsa ong·achim, uandakgipa songrango NPP tangka paisarangko on·na ku·rachakenga,” ine MPCC-ni president aro Shillong-ni Lok Sabha MP aganaha.
Ma·mongo BJP sorkariko rikpiltaina man·genchimode Kristian aro gipin chonchongipa toromrangko dokkol ka·e rotaignok ineba ua aganaha.
Uttarakhand a·dokode BJP sorkari, Uniform Civil Code (UCC)-ko ra·gataha ine janapatskaengon, “A·song gimikon UCC-ko ra·gatahaode Kristianrangsa neng·nikanirangko man·batna nanggnok. Assam-oba BJP sorkari, Kristianrangni Schedule Tribe (ST) status-ko ra·galna miksongengaha,” ine Pala aganaha.
Batanggimin bilsi 10-ni gisepo BJP-chi dilenggipa NDA sorkari, Missionaries of Charity-na gipin a·songrangoni watatenggipa tangka paisarangko champengna jotton ka·aha ineba ua aganaha.
Foreign Contribution (Regulation) Act-chi BJP sorkari, Christian Missionary dolrangna neng·nikanirangko on·na jotton ka·enga ine janapatskaengon, Christian dolrang bang·batan an·tangtangni FCRA licence-rangkoba renew ka·na man·tokjaengaha ine Congress MP parakataha.