TURA: Assam a·dok ning·o ong·enggipa je songrangan Meghalaya a·dokni ning·o ong·na sikengachim, uandakgipa biaprangni giminba Meghalaya sorkari, Assam sorkari baksa agangrikgen ine Bristibar salo, Meghalaya a·dokni Chief Minister Conrad K Sangma ku·rachakaniko on·angaha.
Bristibar salo, West Khasi Hills a·jani ning·o donggipa Athiabari songo, National People’s Party (NPP)-ni candidate-na campaign ka·angengmiting somoio a·dokni Chief Minister aro NPP-ni national president, ia kattarangko aganaha.
“Je biaprangan da·o dipet Assam-o ong·e Meghalaya a·dok ning·o ong·na nangniktokengachim, uandakgipa biaprangkoba chinga Meghalaya a·dokona ra·bana gita Assam sorkari baksa agangrikna miksongenga indiba da·o dipet Lok Sabha election-na dongimin niamrang dongani gimin anga chu·gimikkode aganna man·kujawa,” ine Sangma aganaha.
Je songrangkon Meghalaya a·doko napatna gita 2012 bilsio gitcham Meghalaya sorkari, Assam sorkarina biming see on·atahachim, uano pangchakesa da·o dipet a·dok damgnini sorkarirang agangrikkuenga ineba Chief Minister aganaha.
“Assam a·doko dongenggipa mitam songrangba da·o Meghalaya a·dok ning·o ong·na nangniktokengoba da·o dipet ia songrangko Meghalaya a·doko napatna gita Meghalaya sorkari mamingkoba dakna man·kujaenga maina 2012 bilsio ong·anggipa Meghalaya a·dokni gitcham sorkari, je songrangkon Meghalaya a·doko napatna gita Assam sorkarina see on·atahachim, ua songrangni giminsan da·o Assam aro Meghalaya sorkarini gisepo agangrikenba, ia songrangko napatna gita kamko ka·enga,” ine Sangma aganaha.
A·dok damgnini skanggipa changna agangrikanio je damdok biaprangkon sualgrikahachim, ua biaprango da·o survey-ni kamrang matchotangengaha aro post-rangko songengahani gimin kamrang namen ta·rakengaha ineba ia tom·anio a·dokni Chief Minister parakataha.
Assam a·doko man·anggipa bang·a songrangkon Meghalaya a·dokna on·atpilna gita Assam a·dokni Chief Minister Himanta Biswa Sarma an·tangan kang·kare kae kamko ka·dilaha ineba Sangma mittelpile aganaha.
“2012 bilsio Meghalaya sorkarini biming on·atgipa songrango je songrangkon watchanggalahachim, uandakgipa songrangkoba chinga man·a dipet Meghalaya a·dokona ra·angpilna jotton ka·gen,” ine Chief Minister, ku·rachakaniko on·angaha.
Photo: A·dokni Chief Minister aro NPP-ni national president Conrad K Sangma, West Khasi Hills a·jani ning·o Athiabari songo aganprakenga.