SHILLONG: Voice of the People’s Party (VPP)-ni dilgiparang, an·tangtangko Khasi aro Jaintia jatna kamko ka·gipa dol ine manderangko salna jotton ka·enga ine National People’s Party (NPP)-ni state president aro a·dokni Deputy Chief Minister Prestone Tynsong matnangataha.
Tynsong-ni aganani gitade, manderangni dingtang dingtang nanganirangna Assembly-o ku·rang on·gen ine VPP-ni dilgiparang ku·rachakronga indiba Assembly-o nangchongmota kamrangni gimin chanchirimani somoi sokahaode pangnan pa·sikanirangko dake, Assembly-oni ong·kate katrongaiachim.
Re·anggipa chang Assembly election-o VPP-ni MLA-rang, Assembly-oni ong·kate katahani gimin Tynsong, ia kattarangko aganaha.
“Ia manderangde ramarangosan ku·rangko on·aigiparang ong·ani gimin darangba uamangko bebera·na nangja. Election-o chegenchimode uamang Assembly-o jatni namgnina ku·rang on·gen ine ku·rachakronga indiba bang·bata changon uamang ong·kate katrongaia. Manderangni nanganirang bang·ani gimin uamang ku·rang on·gen ine anga ka·dongsoengachim indiba chonchongipa a·selrangnan uamang ong·kate kataia. Motphran aro manderangni bazaar anti cha·gipa biaprangode uamang ku·rang on·e matcharang gita ranachim indiba Assembly-ode uamang se·elrang gitasa ong·aiaha,” ine NPP-ni state president, South West Khasi Hills a·jani Mawkyrwat-o Shillong Lok Sabha constituency-ni NPP candidate Ampareen Lyngdoh-na campaign ka·engmiting somoio aganaha.
Pilak political dolrangkon ‘mitchigipa’ ine chonnikani gimin aro mondolini dilgiparang baksana NGO-rangkoba matnangrongani gimin ua, VPP-ni president Ardent Miller Basaiawmoit-koba jegalataha.
“Ia dolni dilgiparang pilakkon maming pangchakani gri matnangaia. Uamang angko aro Conrad (Chief Minister)-koba cha·ugiparang ine matnangaha aro chingko rim·naba aganaha. Na·simang angko matnange ronade man·aia indiba angni gimin name sandichengbo. Anga uamangnade aganchakaniko on·ani ong·ja Isolnasa,” ine Tynsong aganaha.
Social media-rango nikaiako bebera·jachina gitaba ua manderangko didiataha.
“Technology-ni chasongode jekoba taridapna man·aia aro jinma tom·anirango manderangni bak ra·anikoba bang·atna man·aia,” ine ua aganaha.
Shillong Lok Sabha constituency-o NPP-ni candidate Ampareen Lyngdoh-ko seokchina Khasi-Jaintia Hills-ni manderangko didiangengon, ia chang Ampareen Lyngdoh seokako man·genchimode Meghalaya a·dokko man·chengaoni uan Khasi me·chikrangoni MP ong·chenggipa ong·aignok ine Tynsong parakataha.