SHILLONG: Indita bilsirangni gisepo Meghalaya a·dokna Inner Line Permit (ILP)-ko dabianio chu·sokgipa ong·na man·chipjaengani gimin dingtang cholrangchi dabiskana gita United Democratic Party (UDP) ku·pattianiko on·angaha.
Dingtang cholrangchi ILP-ko dabiskana nangenga ine janapatengon, iani bidingo a·dok sorkari aro dingtang dingtang political dolrangba bakrime ma·mong sorkarini kosako ‘dekto’ on·na nangenga aro namgipa ja·kurangko de·na nangenga ine UDP-ni general secretary Jemino Mawthoh parakataha.
Mawthoh-ni aganani gitade, a·doko ILP-ko ra·gatchina dabina gita Meghalaya Assembly-oba resolution-ko pass ka·ahachim aro dingtang dingtang dolrangba dontonggijan dabitokengachim.
“Salgro salaramni bang·bata a·dokrangan ILP-ko man·tokaha. BJP-chi sason ka·enggipa Manipur-ba ILP-ko man·aha. Uni gimin Meghalaya a·dokoba gipin jatrangna mikkang niteani gri Tribal-rangni namgnina ILP-ko ra·gatna gita nangengaha aro iana dabianiko ma·mong sorkari knachakna nangchongmota,” ine UDP-ni general secretary aganaha.
Meghalaya a·doko niam gri napsrukanirangko champengna gita nambatgipa niamrangko nichengna nangenga ine janapatskaengon, “Da·alona kingkingan niam gri napsrukanirangko champengna gita maming niamrangko ra·gata dongkujaenga aro iani a·selba so·sojengjeng ong·anirangko chagrongna nangenga,” ine Mawthoh aganaha.
ILP-na dabianiosan ong·aigija Khasi-Garo ku·sikrangko Eighth Schedule-o chapatchina dabianioba a·dokni manderang ku·cholsan ong·na nangenga ineba Mawthoh parakataha.
Meghalaya a·doko ILP-ko ra·gatgija aro Khasi-Garo ku·sikrangko Constitution-ni Eighth Schedule-o chapatchina dabianiko chu·sokatgija bilsisa re·angtaiengaha ineba ua aganaha.
