TURA: Gitcham video-ko Facebook social media-o post ka·anichi National People’s Party (NPP)-ko matnangna jotton ka·aha aro ian ong·gija dakna miksonganiko mesokani ong·aha ine matnangatenba, Williamnagar-ni Youth Congress-ko dilgipa Junebirth C Marak-ni kosako NPP, FIR ka·doangaha.
FIR-ko April-ni 13 tariko, Tura Sadar Police Station-ni officer-in-charge-na NPP West Garo Hills-ni District President JD Sangma ka·aha.
FIR-o parakatani gitade, ia video-ko Garo Hills Digital News (GHD) minggipa online news channel-o watatahachim.
“Dingtang dingtang torom dolrangni gisepo ding·chaogrikaniko ra·bana aro toromni bimingo voter-rangko salna gitasa ia video-ko watataha. Ia video-ra COVID-19 sajinmani somoio Chief Minister Conrad Sangma-ni gimin tarigipa video ong·achim aro ian dingtang dingtang torom dolrangni gisepo ding·chaogrikaniko aro meligrikgijaniko ra·bana miksonge watatanisa ong·aha,” ine NPP-ni ka·doanggipa FIR-o parakataha.
Ia video-ko ong·gija miksonganio post ka·anichi Youth Congress-ni dilgipa, IPC-ni Section 295A-ko pe·ani gita ong·aha ineba NPP-ni FIR-o parakaha.
Indake ong·engon, Youth Congress-ni dilgipa aro una dakchakenggipa manderangni kosako ta·raken ja·kurangko de·china aro je social media channel-on ia video-ko watatahachim, ia channel-ko champengatchina gitaba NPP dabiangaha.
