SHILLONG: Lok Sabha election-na da·o salgittamsan dongaiahaon, campaign ka·engmiting somoirango dolsa dolgipinko matnanggrikani pal manderangni namgninasa ku·rang on·china gita United Democratic Party (UDP), dingtang dingtang political dolrangko didiataha.
“An·chingna a·dokko on·chengaonin an·chingni meli-nangrimaniko an·ching gimaatna nangja maina da·o iandakgipa bewalko an·ching ja·rikanggenchimode mikkangchi democracy-ni pal monocracy-sa ong·skagnok aro ian mikkangchi an·chingni chadamberangna namgijaniko ra·bagen,” ine UDP-ni vice president Allantry F Dkhar aganaha.
Election-na tom·anirangko ong·atanio dingtang dingtang dolrangni gisepo nanggrikanirang aro Ichamati baksana Mawlai Mawroh-o baditaba sak manderangko so·otani bidingo Chief Electoral Officer baksa dingtang dingtang political dolrangni tom·e chanchirimani gimin janapatanio ua ia kattarangko aganaha.
“Political dolni dilgiparang ong·e namgipa dakbewalko an·chingni dedrang su·drangrangna mesokaniara an·chingni daitoan ong·a aro an·chingan a·songni gipin biaprangna aro a·gilsaknaba namgipa dakmesokaniko on·na nanga,” ine UDP-ni vice president aganaha.
Mawlai Mawroh-o labour saksako so·otgipani bidingo janapatengon, “Ia a·selni bidingo ja·kurangko de·na gita police-rangna sal 15 somoiko on·aha aro iana agrede mamingkoba agandapani dongja maina ian police-rangni sandirokanio champengani gita ong·naba gnang,” ine Dkhar aganaha.
Indake ong·engon, party-ni pilak membor-rangkon skatang matnangani kattarangko aganjachina gita UDP-ni dilgiparang aganmanaha ine UDP-ni general secretary Jemino Mawthoh parakatskaaha.
“Gipin political dolrangni giminde chinga mamingkoba aganna man·ja indiba chingni membor-rangde skatang gipinrangko matnangjachina aganmanaha,” ine ua aganaha.
Dingtang dingtang political dolrangni gisepo matnanganirang aro nanggrikanirangni gimin janapatskaengon, “Iandakgipa a·selrang ong·enganiara namen kragijani ong·a, mongsongbate da·o Lok Sabha election-na campaign ka·ani somoirango dolsa dolgipinko matnanggrikaniara kragijani ong·a,” ine Mawthoh aganaha.
“Social media-rango aro dingtang dingtang tom·anirangko niatgenchimode an·ching dolsa dolgipinni kosako matnanggrikanirangkosa nikna man·enga. Ian an·ching gita skia man·gipa songsalnade namen kragijani ong·a,” ine ua aganaha.
Ia Lok Sabha election-o Regional Democratic Alliance (RDA), 2023 bilsini Assembly election-o vote man·a gita apsan daken man·taia ong·ode chegipa ong·telaignok ineba UDP-ni general secretary, an·tangni ka·dongchakenganiko parakataha.
“2023 bilsini Assembly election-o chingni vote man·ako niatgenchimode, UDP 2,90,000 vote-rangko man·aha aro HSPDP 66,000 vote-rangko man·aha. Uni gimin dolgni vote man·aniko chandimgenchimode 3,65,000 vote-rang ong·engani gimin ia changoba apsan daken vote-rangko man·taigenchimode chingni candidate chegipa ong·telaiaha,” ine Mawthoh aganaha.