TURA: April-ni 19 tariko ong·atenggipa Lok Sabha election-o kamrangko ka·na donatako man·gipa polling official-rang, Budbar salonin an·tangtangni polling station-rangona re·chakatangna a·bachengaha.
West Garo Hills a·jao 2-Tura Parliamentary Constituency-ni ning·o donggipa dam 11 Assembly constituency-ni dam 292 polling station-rango kamko ka·na donatako man·gipa polling official-rang, Budbar salni bako, Chasingre-o donggipa ISBT-oni election-na nanggipa pilak bosturangko ra·e an·tangtangni polling station-rangona re·chakatangtokaha.
West Garo Hills a·jani bangki dongkuenggipa dam 247 polling station-rang, jerangan Tura-oni sepangkalgipa biaprango ong·engachim, iandakgipa polling station-rango kam ka·na donatako man·gipa polling official-rangde Bristibar pringoni re·chakatangskagen.
Indake ong·engon, South Garo Hills a·jaoba, 2-Tura (ST) Parliamentary Constituency-ni ning·o donggipa 58-Rongara-Siju Assembly Constituency, 59-Chokpot Assembly Constituency aro 60-Baghmara Assembly Constituency-ni polling station-rango kamrangko ka·na donatako man·gipa polling official-rang, Budbar salonin polling station-tangtangona re·chakatangna a·bachengaha.
South Garo Hills a·jao gimik dam 165 polling station-rang donga aro ianoni dam 108 polling station-rango kamko ka·na donatako man·gipa polling official-rangde, Budbar salonin re·chakatangna a·bachengaha. Bangki dam 57 polling station-o kamko ka·na donatako man·gipa polling official-rang, Bristibar salo an·tangtangni polling station-rangona re·angskagen.
South Garo Hills a·jao gimik sak 1,02,951 voter-rang donga aro ianoni sak 52,946-de me·asarang aro sak 50,005-de me·chikrang ong·a.
Election-ni somoio dingtang dingtang political dolrangni tangka paisa, chu aro uandake dingtang dingtang gam-jinrangchi manderangko salna jotton ka·aniko nirok sandina gita South Garo Hills a·jao dol 10 flying squad team (FST) aro dol 9 static surveillance team (SST)-rangkoba donatahachim.
