TURA: Ia chang Lok Sabha election-ko ong·atanio manderang bang·bate pu·onanio bak ra·ahani gimin election-o susaenggipa candidate-rang, an·tangtangni kusi ong·aniko paraktokaha.
National People’s Party (NPP)-ni candidate aro Tura-ni MP Agatha K Sangma, Sukrobar pringnian, Walbakgre polling station-ona re·ange, konta gittammang ong·na sipile riting dake sengenba pu·onangaha aro pu·onani ja·man kobor ra·timgipa manderang baksa agangrikengon, manderangni bang·en pu·onna re·baaniko nike an·tangni kusi ong·aniko parakataha.
“Parliamentary election-rangode Assembly election-rangona bate manderangni komibate pu·onanikosa nikna man·rongachim indiba ia changode manderang bang·en an·tangtangni vote-ko on·na re·batokaha. India a·song gita dakgipa biapo iandake manderangni pu·onna gisik nanganiara namen namchongmota,” ine Agatha aganaha.
A·dokna namroro silroroaniko ra·baani aro chadamberangna kamrangko on·anian ia election-o uni mongsonggipa miksongani ong·a ineba ua aganaha.
“Pringnian me·chikrangkoba bang·en pu·onna re·baaniko nikna man·aha aro ian namen nambegipa chin ong·enga. Pringni iandake polling station-rangona re·bae senganide me·chikrangna namen rakbegipa kam ong·a maina me·chikrang nokdangko nirokgipa ong·e pangnan jakchakgija ong·ronga. Indiba da·alo me·chikrangni iandake gisiko nangbee pu·onna re·baaniara nambegipa chin ong·aha,” ine NPP-ni candidate aganaha.
Uni ja·man Indian National Congress (INC)-ni candidate Saleng A Sangma-ba Gambegre Assembly constituency-ni ning·o donggipa Jalwagre polling station-ona re·ange pu·oneaha aro uaba polling station-o bang·bea manderangni pu·onna gita riting dake senganiko nike an·tangni kusi ong·aniko parakataha.
“Batanggimin chang Lok Sabha election-rangode anga iandake manderangni bang·e pu·onna re·ongkataniko nikrongjachim indiba ia changode manderang bang·bate pu·onanio bak ra·na re·batokaha. Manderang dingtanganiko nangnikengani giminsa da·alo manderang bang·en pu·onna re·batokaha ine anga bebera·a,” ine Saleng aganaha.
Trinamool Congress (TMC)-ni candidate Zenith M Sangma-ba pu·onani ja·man kobor ra·timgipa manderang baksa agangrikengon, uni polling station-o bang·a manderangni pu·onna re·baaniko nike an·tangni kusi ong·aniko parakataha.
NPP-ni vote-rang pripraahani gimin ia Lok Sabha election-o TMC-nan cholrang nambatenga ineba ua aganaha.
Apsan daken Shillong Parliamentary constituency-o susaenggipa candidate-rang, chong·motan INC-ni Vincent H Pala, NPP-ni Ampareen Lyngdoh, VPP-ni Ricky AJ Syngkon, RDA-ni Robertjune Kharjahrin aro Independent candidate-rangba, ia salo bang·a manderangni pu·onna re·baaniko nike an·tangtangni kusi ong·aniko parakattokaha.
Meghalaya a·dokni Chief Minister aro NPP-ni national president Conrad K Sangma-ba pring 6:30 bajimangon Walbakgre polling station-ona re·ange jinma baksa riting dake pu·onna sengpaaha aro kontagnimangna sengani ja·man ua pu·onna gita man·aha.