TURA: Batanggimin somoirango, South Garo Hills a·jani dingtang dingtang biaprango mande rim·gittanganio mongsonggipa ong·e jak donggipa mandeko police-rang rim·na man·aha.
Police-rangni u·iatani gitade, ia mandeni bidingo koborko man·soani ja·man South Garo Hills a·jani police-rang am·sandiangenba, South Garo Hills a·jao donggipa Gitinggre songni bilsi 29 ong·gipa Rongsrang M Sangma-ko Sombar salo, East Garo Hills a·jao donggipa Rapdikgre songoniko rim·na man·aha.
Iana skangba, South Garo Hills a·jani police-rang, mande rim·gittanggipa apsan dolni sakbonga manderangko dingtang dingtang biaprangoniko rim·na man·ahachim aro ia manderangara, Durabanda Songgital-ni Wilban M Sangma, Upper Dosogre songni Withmil S Marak, South Garo Hills a·jani Chokpot jolo donggipa Chandigre songni Sengsrang Ch Marak, Tura Dakopgre-oni Tengsrang Ch Marak aro Makalgonchu songni Aiber N Sangma ong·achim.
South Garo Hills a·jani SP Shailendra Bamaniya-ni parakatani gitade, Sombar salo police-rangni rim·gipa Rongsrang M Sangma-ra gital bikottaigipa Garo National Liberation Council-Regroup (GNLA-R) bobil dolni membor-ba ong·achim aro ia dolni palan ua mande rim·gittangani aro tangka dabianirangkoba dakdilengachim.
“Mande rim·gittanganio jak donggipa sakdok manderangkon da·o police-rang rim·na man·ahani gimin mande rim·gittanggipa dolko bon·atna man·aha,” ine Bamaniya parakataha.
