SHILLONG: Da·o dipet Shillong parliamentary seat-ko chena gita Congress dolnan cholrang nambatenga ine Mongolbar salo, Mawhati-ni Congress MLS Charles Marngar a·kangataha.
Iani bidingo kobor ra·timgipa manderang baksa agangrikengon, da·o dipet Congress dolni gita pilak polling station-rangonikode hisape nikujaengani gimin badia dol Congress baksa susagrikbatenga, ukode aganna man·kujaenga ine Marngar parakataha.
Congress dolmangmangsan ma·mongo BJP-ko warachakna man·gipa dol ong·engani gimin manderang Shillong-ni Lok Sabha MP Vincent H Pala-on ka·dongchakbattokenga ineba ua aganaha.
Marngar-ni aganani gitade, Shillong parliamentary constituency-ni ning·o donggipa pilak dam 36 Assembly constituency-rangon Congress dolna pu·ongiparang dongani gimin ia changoba Congress dolni candidate-an chepiltaiani cholrang dongenga.
Jripjrip pu·ongiparangoni bang·batan Congress dolnan pu·onaha ineba ua an·tangni ka·dongchakenganiko parakataha.
Indake ong·engon, ia chang Lok Sabha election-ode pilak political dolrangan, diltugipa songrangonaba re·ange campaign ka·na nangahani gimin ian batanggimin chang election-rangonide namen dingtanggipa election ong·aha ine Mawhati-ni Congress MLA parakatskaaha.
Marngar-ni aganani gitade, batanggimin chang election-rangode political dolrang, manderangni mongsonggipa anti cha·ram biaprangosa tom·anirangko ong·ate campaign ka·bataiachim.
Ia election-ode manderangni pu·onaniba namen bataha ine janapatskaengon, ia Lok Sabha election-ode manderangni gisiko nangbee pu·onanirangko nikna man·aha aro iandake manderangni gisik nanganiko batanggimin chang election-rangode nikna man·jachim ine Congress MLA aganaha.