TURA: Bristibar salo, Garo Students Union (GSU) Zikzak regional unit-ni membor-rang, Zikzak jolo donggipa Ganggipara UP skulna adita ki·taprangko on·gilataha.
Ia ki·taprangko GSU Zikzak unit-ni membor-rang, skulo poraienggipa cholgri bi·sarangna dakchakaniko on·na gita on·gilangaha.
“Adita poraiani ki·taprang, jekai Garo, Science, Math, Health Education aro uandakgipa dingtang dingtang ki·taprangko chinga da·alo, Ganggipara UP skulna on·gilataha. Beben chinga chu·gimik ki·taprangkode skulo poraienggipa bi·sa sakantinade tikate on·na man·janaba gnang indiba jemangan kangal cholgri ong·e ki·taprangko brepana chol ong·jaengachim, uandakgipa bi·sarangna ia ki·taprangko suale on·china chinga Ganggipara UP skulni headmaster-ko gronge ia ki·taprangko uni jakon pakwate on·baaha,” ine GSU Zikzak unit-ni dilgiparang parakataha.
South West Garo Hills a·jani chatro chatrirangko lekka poranio tang·doatna gita uamang, man·a gita dakchakanirangko on·na miksongenga ineba GSU Zikzak unit-ni dilgiparang parakataha.
“Da·alo skulni bi·sarangna chinga ki·taprangko on·gilatna man·e kusi ong·a aro iana Nokgipa Isolkoba mittela. Mikkangchiba chinga jolni chatro chatrirangko poraianirangko chu·sokgiparang ong·atna dakchakanirangko on·na miksongenga aro iani bidingo chinga skigiparang baksa ku·monge kamko ka·anggen aro Nokgipa Isoloba bi·chakanggen,” ine GSU Zikzak unit-ni dilgiparang parakataha.
