So·sojengjeng ong·atani kamrangko ka·jachina SP mikrakata
SHILLONG: Budbar salo, NEEPCO-ni official-ko dilangenggipa police-rangni gariko petrol bomachi godapani ja·man Bristibar attamo, a·dokni Deputy Chief Minister Sniawbhalang Dhar-ni Nongmynsong-o donggipa nokko ma·sina man·gijagipa manderang petrol bomachi godapskaaha.
Petrol bomako ramaoni goataha aro ia boma Deputy CM-ni nok kosako ga·akeaha indiba ia petrol bomako godapanio darangba saknaanirangko man·jaha aro maming bosturang nosto ka·ako man·jaha ine police-rang u·iataha.
Ia a·sel ong·ani ja·man Deputy Chief Minister Sniawbhalang Dhar, petrol boma godapgipa manderangni kosako police-rangna FIR ka·doangaha.
Ichamati aro Mawlai Mawroh-o mande so·otanina police-rang, Khasi Students Union (KSU)-ni adita sak membor-rangko potchipenba rim·ahachim aro iani bidingo KSU-ni membor-rang, jingjengatna gita ka·mikkenataniko on·angahachim ine nikna man·a.
Indake ong·engon, iandake so·sojengjeng ong·atani kamrangko ka·jachina gita East Khasi Hills a·jani SP Rituraj Ravi didiatenba, dos dakgipa manderang rim·a man·genchimode niamo pangchake rakgipa sastirangko man·gen ine mikrakataniko on·angaha.
“A·doko songdongenggipa pilak manderangkon iandake niamrangko jaktango ra·jachina chinga didienga. Saoba iako manigija dakgenchimode chinga niamo pangchake rakgipa ja·kurangko de·na nangao ga·akgen,” ine SP parakataha.
Ong·gija dakanide ong·gija dakanian ong·aiani gimin kakket bichalona re·bana gita nangaia ineba Ravi aganaha.
“Chinga iani darangkoba bak ong·atna miksongjaenga indiba dos dakgipade dosni kri sastiko man·na nangaigen,” ine SP aganaha.