Tuesday, May 28, 2024
spot_img

Deborah, Tura Poll-na ka·donge, Sangma nokdangko matnanga

Date:

Share post:

spot_img
spot_img

SHILLONG: Congress-ko Tura seat-na ka·dongsoe, party-ni dilgipa Deborah Marak PA Sangma-ni nokdangko, re·anggipa bilsi 47-o Garo Hills-na maming kamkoba ka·ja ine matnangaha.  “Manderang da·o dingtanganiko nangnikaha, maina Garo Hills-o bang·a cha·bokani ong·aha,” ine Marak Sukrobaro kobor ra·timgiparangna aganaha.
“Cha·bokani” gimin agananio, ua Jal Jeevan Mission, Garo Hills-o chu·sokanigri ong·aha, indiba aganaha. Ua Ma·mongko, agency-chi Garo Hills-o ra·bagipa scheme-rangni gimin sandianiko dakgija mol·molaha.
Marak, una agreba, chini aro guerangko Meghalaya-oni Bangladesh-chi, aro Myanmar-oni Garo Hills-oni niamgri badingaha, ineba matnangaha. Ua agana, niamgri guerangko badingani gimin Garo Hills-o namen noksan ong·na nangaha.
“Election ong·na skang mangmang, Chief Minister (Conrad K Sangma) Meghalaya-ni tangkako cha·ue, gipin a·dokrangchi watataha. Uni giminan manderang dingtanganiko nangnikaha. Congress Garo Hills-o namen nambee kam ka·aha,” ine Marak aganaha.
Ua indake chadrapangkue, agana, Sangma-ni nokdangna ru·uta bilsirangna vote on·ani ja·man da·o manderang dingtanganiko nangnikaha, maina uamang Garo Hills-na  maming kamkon ka·jaha. Uamang PA Sangma Stadium-kosan tariaha, aro uaba da·ona matchotna man·kujaenga, ine aganaha.
Battanggimin bilsirango Coal India plant-ko Nangalbibra-o donani bidingo, Congress-ni dilgipa agana, office-ko chalaigija dongaha, aro bang·a staff-rangkon dingtang biaprangchi watataha, ine aganaha.
Ua agana, Baljek Airport-koba namdapatgija dongaha, jekon da·o manianirangko ong·atnasa jakalskaengaha.
“Ia chasongni chadamberang skia man·giparang ong·aha. (Congress-ni Tura candidate) Saleng Sangma parliament-chi re·ange manderangni gimin ku·rang on·gen. Na·simang Garo Hills-o dingtanganiko nikna man·gen. Result-ni giminsan senge dongaibo,” ine Marak agandapaha.
NPP, poll campaign-ni somoio Garo Hills-o giljako dilgiparangko dilsretaha, giljako dilgiparang aro Christian manderang mikron kana ong·ama? ine Marak, NPP-ko sing·ataha.
“Uamang Manipur aro gipin a·dokrango maidakgipa obosta ong·aha, uko nikaha. Chinga giljako dilgiparangko dilsretna bil dongja. Uamanga sawana vote-ko on·gen, uni gimin namen ma·sigiparang ong·a,” ine Marak agandapaha.

 GSU, SGH-ni tourist spot-ko rongtale rakkichina mol·mola

 TURA: South Garo Hills-ni mingsinggipa tourist biap ‘Wari Chori’ o jabolrangko galani video-rang aro noksarangko social media-o nikani ja·man Chokpot regional unit-ni Garo Students’ Union (GSU) songrebagiparangko tourist spot-o jabolrangko galjachina mol·molaha.
“Ia biap nitoani gimin mingsinggipa ong·aha, aro a·songoni manderangsan songreba ong·ja, una agreba gipin a·songonina nina songrebaha. Chinga songrebagiparangko   uamangni simsake cha·a ringanirangko bosturangko galchina mol·molaha, jedakode  ua biap skang gitan dake rongtale dongna man·gen,” ine Union aganaha.
Union una agreba, joltangni manderangko gipin tourist spot-rang jekai Re’dingsni wari, Imilsang dare, Abong Chigat, Tengte Rongrep, Patijora, Bandare, Rangtang wari, Warima wari, Rekman dare, Gadak Nawepile dare, Asim dare, Dombe wari, Renang Dare aro Tepota-rangko simsake rongtale rakkichinaba mol·molaha, jedakode ia district-rango  tourist-rang re·bana namnikgen.

Meghalaya State Veterinary Council, World Veterinary Day-ko manianga
Shillong: Meghalaya State Veterinary Council, World Veterinay Day-ko Shillong-ni Directorate-o maniangaha. Katta bichongara, “Veterinarians are Essential Health Workers,” jean event-ni mongsonggipa ong·aha, jeon Meghalaya-ni Veterinary and Animal Husbandry Minister, Shri A.L Hek baksana Animal Husbandry & Veterinary Department-ni Secretary Smt. R. M. Kurbah, IAS aro gipinrang re·bae bak ra·angaha.
Smt. R. M. Kurbah, aganprakanio, Veterinary department-ni, publid health policies-o gamchatani gimin agnaaha. Ua, health aro veterinary department-ni apsan melie gamchatgipa kamko ka·ani gimin mongsonge ra·e aganaha. Ua, una agreba jo·ongrangko chelchakani aro champenganiko mongsonganiko talataha. Kurbah, namatana bate chelchakaniko mongsongbate ra·china mol·molaha, aro health sector-ni indakgipa obostao chu·sokaniko man·aha, ine aganaha.
Kurbah, una agreba social media jekai Instagram-ni gitaba rongtalani aro veterinary -ni bidingo jinma manderangna u·iate ma·siate on·chinaba mol·molaha.
Minister A.L Hek, department-ko jinma manderang an·seng baljoke dongna gita  veterinary bosturangko on·china ge·etaha. Ua, department-ni kam ka·anio jako ra·e aro    aro gisik nange kam ka·anio kam gamchate ra·china mol·molaha, aro veterinary department-ko nama biding man·na nama kamko ka·china mol·molaha.
Hek, department-ni a·dokni manderangna kam ong·katatna cholrangko bikotna bil dongakoba janapaha, aro bilake aro nambee kam ka·aniko gamchate ra·china aganaha.
 Niam retiko namatna, Admin,  jinma manderangni dilgiparangko bak on·aniko nangnika

SHILLONG: Niam retio bang·a neng·nikanirangko chagrongengo, East Khasi Hills -ni district administration, jinma manderangni dilgiparangko aro gitcham daka rikani institution-rangko bak ra·ako nangnikaha, jedakode tom·tomaniko ra·bana man·gen, aro niamko pe·ani mamlao koborrangko ra·bana man·gen.
KSU, uamangni memborrangko Ichamati aro Mawlai Mawroh-o mande so·otani bidingo rim·angkugenchimode, bang·a neng·nikarangko chagrongna nanggen, ine mikratani ja·man Shillong-o niam aro reti ja·man chakako nikna man·aha.
East Khasi Hills Deputy Commissioner, SC Sadhu Sukrobaro agana, uamang mitam biaprangko nie dongaha, aro ua biaprangni jinma manderangko dilgiparangko aro gitcham daka rikani institution-rang baksa nangrimaha, jedakode jinma manderangona sokna  man·gen, una agreba koborrangko on·anichi city-o tom·tomaniko rakkie dongna man·gen.
Administration mikkang antio jinma manderangni dolko dilgipa manderang baksa tom·aniko dakgen.
Police-ko watatani bidingo, ua agana, administration, da·omitingo mitam nie dongmangimin biaprangona police-ko watatna tik ka·aha, jedakode ua biaprangko nirikkie dongna man·gen.
Force-rangko ra·badapjana chanchiani bidingo, ua agana, da·o dongenggipa force-rangan mitam basegipa biaprango dongaha, jedakode tom·tome rakkina man·gen.
Ia jaani a·bachengo, police-ni gariko Mawlai police station-o so·aha. Ia a·selra,  sakgni KSU-ni memborko Ichamati-o March 27 tariko so·otani mamlao rim·ani ja·man ong·aha.
Mijao mangmango, sakgni KSU-ni memborrangko Ichamati aro Mawroh-o mande so·otani mamlao rim·aha. Uni adita kontani ja·manan, u·ina man·gija manderang bike-o re·be petrol bomb (police-ni aganani gita kamaha)-chi NEEPCO Director (Personnel) Maj Gen (retired) RK Jha-ko nisan ka·aha.
Gital a·sel ong·anio, Nongminsong-oba Deputy Chief Minister Sniawbhalang Dhar-koba petrol bomb-ni chadrapaha.

CPC, Chenga Benga Mela-o drae til·ekako jegala; a·selo ga·akgipa bak ong·pa  

Tura: Garo Hills-ni Central Puja Committee (CPC), South Garo Hills (SWGH)-o mijao ong·anggipa Chenga Mela-o sakgni tribal me·chikko drae til·ekani mamlao raken jegalataha.
Sonibaro press-na u·iatani gita, CPC indine agana, ua a·selko knaman·soani ja·man gisik suk ong·jaha, aro ja·gokmanpilaha, aro unbaksana a·selo gak·gipana aro uni nokdangni manderang uamangni dukni somoio dongpaha.
“Ia namgijagipa a·selra mande ra·gijaniko mesokani ong·a, maina chingni organisation dal·bee mande ra·anio bebe ra·gipa ong·a. Ua knatogija a·sel ong·anio jak donggipa sak 7 manderangko rim·ani gimin SWGH police-ko chinga mande ra·aha. Chinga police administration-ko ua a·sel ong·ani mamla jak donggipa manderangko rim·dapkuchina mol·molenga,” ine koborna u·iatanio aganaha.
Social organization dol dakgiparangko ta·raken rim·e sasti on·e a·sel ga·akgipana  kaket bichalko on·china aro chakpachina mol·molaha.
“Una agreba CPC, re·baenggipa salo Babedpara-o ong·nasigipa Charantala Mela-oba, bak ra·na re·bagipa manderangko simsake niroke re·a doaniko gamchate ra·aniko nangnikaha, jeon lak-na bata manderangko bak ra·na re·bana ka·dongsoaha. Bak ra·na re·bagiparangko niroke chelchakchina chinga dilgiparango mol·molenga,” ine ua u·iatanio aganaha.

spot_img
spot_img

Related articles

Tribal youth lynched in Bengal’s Jalpaiguri, five arrested

Shillong, May 28: A tribal youth was lynched by eight people at Nagrakata in West Bengal's Jalpaiguri district,...

Janhvi Kapoor talks about her ‘Zingaat’ viral dance with Rihanna

Shillong, May 28: Bollywood's Gen-Z diva Janhvi Kapoor shared details about her viral video dancing to the track...

Pune Porsche crash: Special probe panel reaches Sassoon Hospital

Shillong, May 28: Taking a grim view of the blood sample change of the prime accused in the...

Thousands evacuated from still-active landslide in Papua New Guinea

Shillong, May 28: Thousands of residents are being evacuated from the still-active massive landslide in Papua New Guinea's...