TURA: Adita salrangna skang, South West Garo Hills a·jani Garobadha samba jolo donggipa Gandhipara songo, Chenga Benga Mela-ko ong·ataniona re·anggipa me·chik bi·sa sakgniko chadrapenba drae til·ekahani gimin United Hajong Community Development Organisation (UHCDO)-ba raken jegalataha.
Re·anggipa April-ni 16 tariko, me·chik bi·sa sakgni, an·tangtangni ripeng sakgni baksa South West Garo Hills a·jani Gandhipara songo ong·atanggipa Chenga Benga Mela-ona re·angahachim.
Skanggipao, me·chik bi·sa saksa an·tangni me·asa ripeng baksa, mela-ko ong·atenggipa biaponi adita chel·kala biapona re·angon, ua biapo dolsa manderang uamangko timsoenba chadrapsoaha aro me·asako siboke dokani ja·man me·chik bi·sakoba doke sibokataha. Me·chik bi·sa sibokani ja·man, ia manderang me·chik bi·sako kragija dake kal·aka aro me·chik bi·sa sibokani a·sel ia manderangko ma·sirikjaha.
Iani ja·mano, sakgipin me·chik bi·saba, an·tangni me·asa ripeng baksa apsan biapona re·angon, uano ia apsan manderangan dongsoenba me·asa bi·sako kae dokaha aro me·chikkoba ia manderang kragija dake dokaha ine police-rang u·iataha.
Police-rangni u·iatani gitade, me·chik sakgnikon drae til·ekaha ine matnangtokahaoba medical-ni gita porikka ra·aniode me·chik saksakosan drae til·ekaha ine ma·sina man·ahachim indiba me·chik sakgni aro uamangni me·asa sakgnikoba ia manderang, bilongbee dokahachim.
Indake ong·engon, me·chik bi·sa sakgniko kragija dake dokanina aro drae til·ekanina UHCDO jegalatenba, a·sel ong·anio ga·akgipa me·chik bi·sarangni nokdangrangna kalimpaanikoba parakataha.
Ia a·sel ong·anio jak donggipa saksni manderangko rim·ahani gimin South West Garo Hills a·jani police-rangko mittelpilatskaengon, ia a·sel ong·anio jak donggipa gipin manderangkoba ta·raken rim·china aro kakket bichalona rimbachina gita UHCDO, police-rangko didiataha.