Shillong: Da·omitingo chadoenggipa Voice of the People Party (VPP)-ni chipakkorede, mikka jimbrake chi dal·bagitike chepangpila gitasan ong·aigen ine UDP working president, Paul Lyngdoh Sombar salo aganaha.
Sombar salo koborna parakengon, VPP, a·doko UDP-ni biapko ra·skagen ine mamingdakeba nikateni dongja ineba Lyngdoh aganaha.
Ua indakeba aganaha je, UDP-de rakgipa salrangko chagronge tangrikgipasa, unigimin indakgipa gitalgipa political party-na maming kenchakani dongja.
“UDP-de, jedakgipa karioba jokamaigipa chiring gitasajok. Indiba VPP-ni chipakkorede mikka jimbrake dikdiksa chi dal·e chepangaigipa gitasan. Ian dal·bae, jokbrakenge bon·aia,” UDP working president aganaha.
Politics-ara chel·e katsusana nanggipa ong·a ine aganengon, VPP-ni susaaniara 100 meter-ko katna jotton ka·a gitasan ong·aia, Lyngdoh aganaha.
“Iano dingtanggrikani gnang, indiba anga VPP-na nama skaniko on·a. Uamang tangbangangchina,” Lyngdoh aganaha.
Da·oni VPP-ni chipakkoreko nienba VPP, UDP-na kenchakani ong·gen ine mitam political dolrang chanchichipengachim.
Shillong Parliamentary seat-na susaanio, UDP-ni man·gni vote-rang VPP-chi sokanggen ine chanchianirangba ong·engachim.
VPP-ni bilakbaaniko a·dokni political dolrang ma·sina ja·manchaktokenga ine VPP spokesperson, Batskhem Myrboh unaskango aganengachim.
