TURA: Selsella C&RD Block-na gital rikenggipa office building, sorkarini chame on·gipa tangka paisarang baksa melijaenga ine Selsella-ni ASWA, GSU aro FKJGP dolrang matnangatenba, ia gital rikenggipa building-ni gimin name nipiltaichina gita Selsella-ni BDO-ko didiataha.
Ia dolgittam NGO-rangni parakatani gitade, Selsella Block-ni gital building-ko rikani bidingo RTI ka·e am·sandion, ia gital building-ko rikna gita gimik gong kror 3 tangkarangko chamataha ine ma·sina man·ahachim indiba ia gital rikenggipa nokko nieon, ia gital building-ko rikna chamatgipa tangka paisarang gita ong·jaenga ine nikna man·skaaha.
“Chingni chanchiani gitade, ia gital building-ko Reinforced Cement Concrete (RCC) building riknasa sorkari tangka paisarangko chamatahachimkon indiba da·o rikenggipa nokko nigenchimode Assam Type nok gitasan ong·aienga,” ine dolgittam NGO-rang parakatenba, ian tangka paisarangko jakkalani bidingo sing·doanirangko ong·katatenga ine janapataha.
Ia gital building-ko rikanio koros ong·anirangko che·em che·em see on·china gitaba dolgittam NGO-rang, Selsella-ni BDO-ko didiataha.
“Manderangni tangka paisarangko jakkalanio maming dongnuani dongjana gita chinga nang·ni talataniko nangnikenga,” ine NGO-rang parakataha.
Ia gital rikenggipa building-ni bidingo name am·sandijagenchimode ia gital building-ko nokdonggana on·jawa ineba dolgittam NGO-rang mikrakataniko on·ataha.
“Iani bidingo name talatchenganiko on·ja ong·ode chinga ia building-ko nokdonggaanioba bak ra·jawa,” ine NGO-rang parakataha.
Selsella-o rikenggipa gital Block building-ko nipiltaichina NGO-rang dabia
Date:
Share post:
