Baghmara: South Garo Hills (SGH)-ni ning·o donggipa Tolegre songo rongkoloniko fossil ba gitcham matburingrangni bosturangko man·anganio dikdiksana jeon da·o fossil donggipa biapko chipna Deputy Commissioner, Shivansh Awasthi ge·etaha.
May 3 tariko ge·etani gita DC gimiknan u·iataha jeon da·o am·sandianiko dakangkuengaonin porikka ra·e niani matchotkuna kingking manderangna dikdiksana rongkolona re·anganiko dondipchengaha.
Je official ba mandeni gita napna nangchongmota ong·ode skanggipa DC-oni permission-ko ra·chengna nanggen ine ge·etanio u·iatapdaha.
Ia bilsini March jao, man·dapanina kam ka·gijagipa organization-oni Core Geo Expeditions-oni am·jojoe nigipa dol Tolegre biapni wilwilao donggipa rongkolrangoni uamangni am·sandimiting somoio bilsi million 35-40-ni gisepo ong·gipa fossil ba gitcham matburingrangni bosturang ong·na nanga ine chanchichipe man·gipako parakataha.
Chanchichipgipa fossil ba gitcham matburingni bosturang Rhodocetus ba Ambulocetus-ni ong·naba donga. Ia matburingrang see rakkina skang dal·begipa matburingrangoni mamalsa jatoni ong·naba donga ine bebe ra·enga.
Am·sandie man·gipako Geological Survey of India-ni gita district administration-chi fossil-ko name dake nichina CGE bi·angaha jeni team-an sandienggipa dolrang je saloba kam ka·angna ka·dongsoenga.
