SHILLONG/TURA: Robibar salpaksachibara, mikka balwa baksana stilrang jimbee onanganichi, a·dokni dingtang dingtang biaprango nok-jamrang aro manderangni bagan barirang aditan nosto ka·ako man·angaha.
Koborko on·ani gitade, Robibar salpaksachibara mikka balwa ta·rakangan baksana stilrang jimbee ga·akanganichi a·dokni damsni a·jarangon nangchakeaniko man·aha aro ia a·jarangoni komibeoba te 480-mangni gita nokrang nosto ka·ako man·aha.
Mikka balwa aro stilrangni ga·akanio nangchakeaniko man·gipa biaprangara, South Garo Hills-o Baghmara, Chokpot jolrang, East Jaintia Hills-o Wapung aro Saipung jolrang, West Jaintia Hills-o Thadlaskein aro Amlarem jolrang, South West Khasi Hills-o Mawkyrwat jolrang, Eastern West Khasi Hills-o Mairang jolrang, West Khasi Hills-o Nongstoin aro Mawshynrut jolrang aro East Khasi Hills a·jao Mawkynrew aro Mawryngkneng jolrang ong·aha ine kobor on·timgiparang u·iataha.
Mikka balwa ta·rakanganio ramram rikgipa wa·seni nokrang bang·en nosto ka·angako man·na nangaha ineba kobor on·aha.
South Garo Hills a·jaoba stilrang jimbee ga·akanganichi nok-jamrang aro bagan barirang bang·en nosto ka·ako man·angaha aro kobor on·ani gitade Baghmara, Nengkong aro Rongchekgre jolrango nok-jamrang bang·en nosto ka·ako man·aha.
East Khasi Hills a·jao mikka balwa baksana stilrang jimbee ga·akanganichi nok-jamrang nosto ka·ako man·e nokgri jamgri ong·na nanggipa manderangko dingtang biaprangona apjitataha aro uamangna sorkari, cha·ani ring·anirangko dakchake on·enga ineba kobor on·aha.
Nokgri jamgri ong·na nanggipa nokdangrangna sorkari, tin aro dingtang dingtang nanga bosturangkoba suale on·na a·bachengataha.