TURA: Tura-ni MDC Bernard N Marak, Tura GDC constituency-o pang 10,000 bolrangko aro Garo Hills gimiko pang million-sa bolrangko ge·na ja·ku de·chakataha.
Iani bidingo kobor setimgiparangna seachi u·iatengon, Garo Hills-o chiring chibisikrang ta·raken tipangengani gimin chiring chibisikrangko tangatpilna gita Nokmarangni ning·o ga·akgipa biaprango aro chi chimongchakgipa biaprango ua bolrangko ge·na a·bachengataha ine Marak parakataha.
“Ia sal somoirango chiring chibisikrang ta·raken tipangengahani gimin ian mikkangchi janggi tangnagipa chasongna aro manderangna kenchakna nangani ong·enga. Manderangni mikbokrakanichi samtangtango donggipa bol wa·arangko skatang den·aha aro an·ching da·o namjabegipa somoirangko nikna nangengaha. Uni gimin an·ching pilakan iana mikrake da·onin kamrangko ka·sona nangengaha,” ine Tura-ni MDC parakataha.
Samtangtango ong·telaigiparangna ka·sagenchimosa, samtangtango ong·telaigiparangba tangpilna gita man·gen ine janapatskaengon, Garo Hills-o bol ge·aniko dakna gita college-rango, skulrango aro dingtang dingtang a·kingrango eco-club-rangko bikotgen ine Marak parakataha.
Meghalaya a·dokko tangsekgilgil ong·atpiltaina gita ua chadamberangkoba uni kamo bakrimchina gita didiataha.
