SHILLONG: A·dokni saksa senior IPS officer Idashisha Nongrang-ko a·dokni gital Director General of Police (DGP) songchina gita Voice of the People’s Party (VPP), NPP-chi dilenggipa MDA sorkariko didiataha.
“A·dokni Tribal jatrangoniko DGP-na songaniara a·doko songdongenggipa manderangna mikkim rasongni ong·gen. Nongrang-ko DGP songgenchimode, joltangni gimin ma·sibatgipa ong·ani gimin police aro manderangni gisepo kamrangkoba nambate aro ma·sichakgrike ka·na man·gen. Nongrang-ko uni kam sapanina, on·kanganina aro kamtango bimchipanina mingsingtoka,” ine VPP-ni ku·wattimgipa Batskhem Myrboh parakataha.
Nongrang-ko a·dok sorkari gital DGP songna man·jagenchimode uan a·doko songdongenggipa manderangni nangnikaniko chu·sokatja gita ong·gen ineba ua aganaha.
Nongrang-ko a·dokni DGP songchina gita VPP, dingtangmancha sorkarina seachiba didiatgen ineba Myrboh aganaha.
Meghalaya a·dokni da·o ong·enggipa DGP Lajja Ram Bishnoi, May-ni 19 tarikon kamtangoni neng·takangengahani gimin uni biapko ra·rikna gita UPSC, sakgittam IPS officer, chong·motan 1992 batch-ni Idashisha Nongrang, 1993 batch-ni Ram Prasad Meena aro 1994 batch-ni Deepak Kumar-ko minge donsomanahachim.
